元豐泰華劍寶都靈一號兵奇臨 無雙小子傲闖成就美麗神勇馬車

猪拉多纳

        今日田草泥10場賽事，韋達復出，但坐騎唔算多，不過，佢批坐騎隔晚隻隻多飛，有部分卻嫌過熱了。
        　　此外，今日有好幾場賽事並無重心可言，十成十會爆，唯一希望唔好似上次C欄，幾匹大冷門走晒出嚟。


        「元豐泰」唔知有幾多耐性，但落班轉場表面上態度好清晰。而睇佢之前兩場四班此程演出，夠速度又夠韌，推算今仗2檔起步，如早段順利霸到喺前列，直路鬥檻足以入到三甲。
        
        「華劍寶」跑到氣管有血，順勢唞番個幾月，儲夠體力及新鮮感，回跑此程好有威力，始終季初排12檔贏同程唔係簡單（頭兩段快過四班段速）。
        
        「都靈一號」教好把口，轉到型變後上馬，預期好快出頭，泥地性能則未必及得上前兩駒。「厲行星」最近大閘唔算特別「養眼」。「兵奇臨」12月底曾缺課，影響有多大難講。「博利好」個幾月夠唔夠新鮮感，要博。「千笑」12月頭退出後，準備未停過，泥閘放番嚟贏亦輕鬆，但今場內側至少有兩駒會快，際遇難料。

        「盈豐快駒」比較起之前兩場賽事，脾氣未改到，不過，末段韌性好咗，希望加程會幫到。「金威王子」上賽好位而拉士衝落唔多，輸近賽績唔建議放大，只係今仗繼續好位及對手唔多，拖埋而已。
        
        「喜發龍」第2個閘加頭罩，試來比首閘規矩，以及主動性強咗，略有好感。「電子福星」進度不及前駒，要爭取成績，要睇質地如何。「風莫停」進步不大，成熟程度有待改善。


        「傲男」初出與三班此程好手「精奇」埋Q，並可彈開「陽光普照」，賽績好實淨。「博愛福星」要面對加程及升班，進度要大幅升級先夠跑。
        
        「進取」此程唔擅長，跑得好都係三三四四居多。「天瞳」近兩仗直路衝刺強，轉到此程會更好。「高分貝」狀態不及之前。「名人」未知何日才可走出低谷，分數則已有利。
      

        「翔龍」血統有長力支持，改戰1800米可能比1600米合適，加上，本身當起，點都睇高啲。
        
        「家傳碧玉」前仗揀過，睇落暫時進度似乎喺四班先掂，至於加程問題唔大。「京城三寶」唔係冇「胃口」，此程比中程仲有競爭力。「正榮」遇着今場唔多快馬，或可食正形勢。「福陞」及「中華寶寶」，近績好差，彼此卻存在變數，冷冷哋可拖埋。


        「神奇飛龍」泥轉草即勝，終展示轉馬房後效益，按上賽贏馬姿態，加9分消化到有餘。
        
        「榮進蜜運」縮程效果冇預期般理想，回到此程要視乎留得順唔順，同時，步速快先會啱佢。「育成王子」大閘有時慢出、搶口，亦有時會斜跑，係未熟，但大嚿飯幾好鬥心。「信賴」和「桂花飄香」，1隻老來嬌，另1匹評分佔利，俱可留意。
      

        「無雙小子」泥地性能恰可，由於今場或有足夠步速，賽事環境啱發揮，而睇賽前手法，呢場係目標。
        
        「神勇馬車」唔係超級，好在位靚路合，易攞着數。「傲闖」初跑此程可緊隨前駒返嚟，場地性能差極有譜。「成就美麗」末段爆炸力，唔係一般四班馬可比。「閃耀小子」跑法應合泥地，但勝唔勝任就要博一博。


        「馬之王」快時間贏同程，擺前走更具威力，惟加磅及又排外檔，唔一定有番上賽形勢。
        
        「勁力」轉場，性能要估，喺三班則略超。「新力飛」跑落已比預期失望幾多，漸漸心灰。「時代明星」及「御將軍」，評分唔算着數，跑形勢，或可接近。「仔仔女女」計之前贏過「帝豪駿駒」，分數應未盡，回到起家路程，或起到作用。


        「小橋流水」直路專家，遇慢地冇問題，7檔又唔係失利，條件四正。「蓮華生輝」目前以此程最強，跑短200米，或有番該有追勁。
        
        「飛闖」跑法及跑線受惠，係擔心級數。「鷹之團」未必係想像中咁蝕，因佢直路賽究竟值幾多分，仍然未知。「天久」新鮮感未必夠，此程比1200米仲難應付。「富貴金龍」和「共創未來」此程不及1200米。


        「飛燕」和「夢幻十一」，各有各優點，前駒初出一鞭冇打過就贏，姿態具氣派，只係之前缺過課啫；後駒剛征服三班，進度趕上評分加幅了，應該係單挑之局。「叻叻仔」今季跑到第3仗終於有兩腳，宜跟進。「雲吞蝦王」夠快又大步，初出已有爭P機會。


        「何方神聖」往績夠吸引，唔應該到依家仲係處女馬。而上場塞到最後幾十米，衝幾步有Q嘅追勢亦勁，希望繼續交出表現。
        
        「經典皇牌」及「皇龍戰駒」，前駒評分已回落至有利水平，肯轉回草地，可能有意思郁手；後駒只係準，分數漸漸見頂。「喜蓮標緻」泥轉草繼續跑得好，開始證明到本身能力。「多采多姿」如用番後上跑法，孭呢個磅喺二班好有威力。