小宇宙攞尾彩

猪拉多纳

　　今期賽事係兔年最後一戰，攞尾彩人人想，至於係咪順順利利，當然因人而異，但咪嫌阿棟苦口婆心，凡事要量力而為，以及記住忍一時，硬係要追，有陣時愈係追唔到，所以，抱着平常心最緊要，機會時時有，急於一時，又未必有後福，總之，預祝大家場場勝利！

　　第三場四班1000米。「小宇宙」初出同程放入殿軍，輸畀頭馬「名舵主」唔夠1個身位，而嗰場亞軍「龜兔競跑」翌仗補中，季軍「綻放美麗」之後1場亦有Q，證明係強組賽事。所以，上場「小宇宙」再跑入P，真係有啲理所當然，雖然，大熱門最後贏唔到，見佢陣中有轉變係好事，已經冇初出時咁急口。如果今場加配備再有啲幫助，有望出頭。

　　第五場四班1400米。「尊勝福星」初出已經在此程得第四，翌仗成功補中，雖然蹄下敗將唔係特別叻，本身已做出難度動作，始終新馬一出中程已輸近，之後即坐正，少啲實力都唔得。今仗在原班再戰，加至133磅，由於佢身壯如牛，負重方面唔會成問題，只要9檔唔係令隻馬前中段發揮錯到極，今場對手唔多，有望再捷。

　　第七場三班1000米。「精靈勇駿」係大前仗跑到唔知想點，前仗一轉到此程，即刻成隻生猛晒，只係以短頭見負，而上場再跑，更以超班姿態贏馬，時間又靚，有晒說服力。今仗加8磅，唔係冇壓力，但對手又係差唔多，如果仍有戰意，唔難連捷。

陳華棟　資深評馬人