生生不息勝任有餘福喜驚喜

猪拉多纳

　　回看近3期谷草A欄賽事，24場頭馬之中，在10倍以下為數共16匹，之但係，大熱門身份勝出只得兩駒，的確係比預期少。今晚賽事不論騎師或練馬師，冇邊個多子彈，實力馬分得幾散，所以，隔晚騎師王賠率都冇騎師出現一面倒局面，唔通係爆冷先兆？

重心場次　第4場　第四班（60-40分）1200米

　　「卡加精神」前仗已揀過，當時指出只要跑得冇之前賽事咁蝕，已經有上名資格，結果該場後上入P，而睇番嗰場賽事，前四名之後加埋贏多4場，屬指標性賽事，引伸到此馬目前分數有潛在漲幅。上場跑輸全拜直路頭受困，與實力無關。雖然今仗賽前工夫曾略略放慢過，如影響不大，跑出前仗水平，或憑直路掃晒。

　　「團隊精神」及「皇仁勁駒」剛仗近乎同到，今仗路程冇變而檔位仲好，正路腳。「風動寶」喘鳴之後唞了個幾月，如搞番掂健康，1檔會賺到盡。

　　「威威加瑪」加眼罩用意好，問題係8檔喺早段會點？如能切入搶到欄，將會好好跑，但如頂在三叠又放唔到就「窩河」。「都靈一號」回到四班，已冇上場咁鍾意。「雄姿儷影」跑落冇預期潛力。

　　「實業傳奇」已講過目前口勁受控，接連交出成績屬預期之內，難得出現穩定期，唔會嘥機會。「金滿貫」回到谷草中長途，又有埋內檔，其實好有競爭力。

　　一對「無敵」，能力以「無敵福星」略高，惜磅重係負累；「無敵駿駒」剛仗可追貼「恭喜發財」，具跟進價值。「天寶之威」演出時好時劣，但賽前工夫又出現加壓程序，近日此廐已有好多類似成功例子，路程長少少亦唔可以當冇到。

　　「綠色快駒」少數徐廐一出即勝例子，底質唔簡單，惜今仗未必又有上場包廂位置，要考驗進度。

　　「永同至尊」再遇前駒，排檔內移，內側快馬有限，會比前仗好發揮。

　　「奪寶」4仗前三班同程獲殿軍，今場班次唔同、檔位好咗，早段搶出，以其速度唔係冇本事帶到。

　　「日日中」上場有揀，但今場谷草12檔，有前速亦難克服。「辣得喜」5檔冇之前兩仗處境咁差，或會扭轉劣績。

　　「生生不息」跑到上場見番末段纏鬥力，透過賽事重返正軌。今場少馬走，又會係沿路跟「華倫天奴」，可能繼續成為受益者。「勝任有餘」情況類似前駒，而賽前準備似樣，有心再搏。

　　「福喜」上場跟好位返嚟衝唔起係失望，係咪末段內閃難騎關係？唔排除呢個可能，今場如再係咁先放棄。「雪山神駒」和「駕寶」，前中段形勢如何，對佢哋後上跑法好關鍵。「驚喜」已經啱分，漸到危險線，而上場全因直路中段冇位，至會衝得唔順，勿介意。

　　「化工之昇」外檔唔係好擔心，只要早段夠積極，二叠亦蝕得起（上季曾在C+3欄10檔跟前入Q），計分已減到過晒籠，增程有力補中。

　　「魅力心」、「共同目標」及「彪形好漢」，如步速夠快，將會獲得充分發揮。「歡欣星」唔鍾意上場初跑一哩採跟前跑法，若立心留留埋埋唧一段，真係唔到此程先會心息。「閃耀小子」6檔睇際遇，前段楔得好，或會重現兩仗前實力。

　　「駿蹄飛」確認轉馬房後嗰套操練受落，跑完多操唔瘦更加難得，而騎練谷草合作暫未失拖，只要唔係早段慢到冇得追，名次必可提升。

　　「中國動力」可能淨係佢會放，賺晒賽事環境。「勁有盈」上場發揮「烏里單刀」，根本唔可以作準。「連利福星」剛賽12檔夠膽揀，反而今仗7檔尷尷尬尬，騎者又有機會「外遊」。

　　「仁愛之友」暫時唔叻，要靠內檔幫手爭位。「合駿騰飛」上仗追勢其實唔算好勁。「開心動力」減分太快，加上配件有變，總有1場變身。

　　「江山如畫」磅位帳面數因用小將有賺，排檔好亦易發揮，倘跑到上場水準（季內廿場此程最快時間），有望三連捷。

　　「紅衣叻叻」演繹唔夠放膽，令上場早段畀前駒攞咗先機，今仗8檔如果又喺早段揨，風險仲大，所以，視乎指示如何！

　　「多益善」上場差得咁恐怖有點脫離現實，返谷草及好位，睇多場先斷定。「駟馬難追」分數漸爆錶，係跑埋呢啖火。「但求勝」長期成熱，長期跑三三四四，買三重彩先拖！「精靈勇駿」1W過後，未知何日回來？

　　「千杯不醉」與「開心老友」又碰頭，前駒有級數，今仗卻會蝕了形勢；後駒有同場2號、3號兩駒帶住跑，事半功倍，馬房出王牌要拖住。

　　「四季」上季贏同程水準好，加分後唔會太大壓力。「邦先生」落在巫斯義手中，的確令其性能發揮得淋漓盡致，而此程亦唔會考起隻馬。「勁高手」體重比上季仍略高，可能未夠跑頭。

馬會賽馬節目主持　洪禮賢