馬主論戰

猪拉多纳

盈豐快駒轉場掂

　　今晚姚本輝手馬唔錯，我睇佢應該有馬贏，甚至可以起孖。先揀第三場「盈豐快駒」，近兩仗對住「跑寶貝跑」、「電子福星」等質新老虎，能夠入位已有交代，今次轉嚟谷草上陣，對手實力差一截，係時候開齋。

　　另外推介第四場「精密紡」，呢隻馬最近連續三場響郭能胯下入Q，未能贏馬只係差些少運氣，今次續配郭能上陣，相信騎者都想幫隻馬贏番一場，必定鍊盡。

張敬山

開心動力咪睇小

　　柏寶剛啱憑「長勝」同「幸運金龍」起孖，搏殺手風好順，今晚一於再捧佢啲馬。推介第七場「開心動力」，季內跑九場全部三甲不入，表現無疑係令人失望，但評分亦因此減咗唔少，話晒上季尾曾跑近「甜橙」上名，今次強配柏寶咪睇小。

　　另外鍾意尾場「活力飛駒」，季內對住「鷹之團」一樣跑近，今次轉嚟谷草上陣有着數，隨時殺個措手不及。

任達華

捧李廐馬齊勝

　　李易達馬房剛啱憑「風度翩翩」取得頭馬進帳，唔經唔覺呢個倉已累積16場頭馬。今晚李廐出五駒，鍾意頭場「齊勝」，上季落五班跑過一仗即勝，今季跑咗四場減分之後，今次落到五班上陣，係時候郁手。

　　另外捧尾場「享耆成」，近兩場都以兵不血刃姿態贏馬，五歲馬愈跑愈進步，為爭跑馬地百萬挑戰盃必鍊盡。

寇鴻萍、梁廷鏘