大家勝利幸運紀錄閃耀之星旋風魅力

猪拉多纳

　　今晚谷草B欄賽事，一如以往比較利於直路喺外叠衝，但因為今晚可能受天雨影響，模式會唔會相似，要睇睇頭一兩場先知。今期前三位騎師韋達、柏寶及潘頓，胯下有幾多馬騎，但亦唔見得好多係有冠軍相，所以，佢哋啲馬真係要小心揀選先好。

重心場次　第5場　第三班（80-60分）1200米

　　「大家勝利」加分後、冇賽事形勢，上賽即刻名次退步，但轉到谷草，對手唔同，冇咁難啃，如4檔喺早段把握得好，放得出而又順，未必冇得贏。

　　「閃耀之星」早已指出三班要睇人面色，好在位好、對手普通，稍為提升評級。「幸運紀錄」以之前兩勝姿態，升到三班依然有優勢。

　　「金獅駿將」及「日月暉華」，三班下風，要對手跑得唔好先至有機會。「旋風魅力」喺中程爆唔起，加罩縮回1200米冇錯，希望休賽1個月儲得夠新鮮感。「御將軍」除非淋地才有轉機。

　　「瀟洒靚龍」向來早段速度有保證，此程又會比1200米易捱，5檔易於切入，如搶到欄，有力帶返。

　　「叻先生」已證明唔叻，目前純粹跑弗及跑形勢。「友情友義」1檔預咗賺，論評分則早已有利。「飛躍之鋒」及「盈驥」，變化地靠追始終蝕底。「路路好」唔係8檔，可能會考慮，因本身速度在五班谷草或夠用。

　　「喜欣賞」剛轉戰田草算係跑得唔錯，多了場中程實戰後，回到谷草一哩，有可能加快進度。

　　「勝利駿駒」及「財源來」，之前同場喺差唔多位置過終點，只係輸近而已，何況，前駒好考尺寸，後駒騎練合作麻麻，只宜拖腳。

　　「清脆利落」工序有啲唔似樣，初上一哩也是考驗。「勁擊」如B欄模式冇變，最啱佢發揮。

　　「盈豐快駒」暫時在田草唔易出頭，反而轉谷草避撼其他新血，未嘗唔係好事。今次谷草抽到1檔，而本身傾向前置型，唔係急彎考起的話，三甲穩。

　　「金鑛龍華」千辛萬苦贏同程，壓倒3匹季內唔識出頭之馬，水準唔會叻，只尊重新勝及選擇唔多，拖一注。

　　「樂融融」場地性能未明，論處境與前駒差唔多。「超勝」已失望多次；「百利旺」恐一招了，冷才諗。「無敵」有鋪排等今場，或降班即郁手。「開心駕到」連前速都冇埋，且看重戴眼罩如何。

　　「福陞」已於上場揀過，唔係途中一再遇意外，可能中段唔使太落後，成套發揮又會唔同，不過，能後追入P已不錯。如今仗用巫斯義能夠跑得啱，話晒季初此程拍實「財駿福星」返嚟，四班略佔上風，值得一敲。

　　「精密紡」和「金瑞」勝在演出準，以及跑法擺前，容易攞到着數，正路腳。「天鷹」唔係立心等，目前分數已具威脅。「好運得福」成日健康有事，或追唔切，冷門至拖一票。

　　「更捷勝」與「實業傳奇」，輕磅但班次優勢有限。

　　「軍花」場地唔快又唔啱路程，一樣跟入前列，剛賽演出略有驚喜，轉頭回到谷草長途，形勢好得多，有權更有威脅。

　　「精算縱橫」及「中環英雄」，近績可靠，但輸在路程經驗。「喜跑得」講求形勢就唔就，同埋，留放要夾啱。「駕翠」上場輸近賽績唔係證明好多。「好旺財」場地唔慢至有機會．

　　「南陽望族」場地唔係太慢會應付到，終歸係鐵馬，可靠性大。「陽光普照」轉谷草排到1檔，因應跑法，有權由頭賺到尾。

　　「超級精神」夠唔夠班未知，近績則有信心。「紅日」近兩仗唔係受阻，就係「外遊」，敗績咪介意。

　　「揀得正」遇上一批比剛賽較次對手，今場未必追唔到。「香檳歲月」排外檔，驚似上場埋唔到尾。

　　「錢照贏」有番前速，而上賽放至埋門至斷，今場跑短200米，隨時一口氣帶返。

　　「大把在手」只因往績靚，但要贏已有難度。「飛闖」贏級數卻冇此程經驗，要睇留放如何。

　　「佳同」及「享耆成」，路程唔算合適，排檔亦略為不好。「風之子」死路程，做足準備而來必拼。「高風格」與「活力飛駒」唔係大外檔，其實可納入選擇範圍。

馬會賽馬節目主持　洪禮賢