今期唔只叠馬咁簡單 告東尼泥地開飯

猪拉多纳

　　今期幾個大馬房之中，以告東尼最叠馬，場場有馬出，一共11駒之多，但有時兵多又未必代表啲乜！譬如呢個馬房喺之前（29/1）咪又係派出11匹馬上陣，結果只得兩席季軍，當日牌面馬如「風火飛駒」及「加州萬里」，贏唔到就贏唔到！

　　不過，此一時，彼一時，今期東廐機會馬多的是，真係稱得上「好好機會」，而在3場泥地嘅出賽馬「開心指數」、「成就美麗」和「一定快」，統統都有贏面，廐主應該會有着落。

　　「開心指數」初出直路賽表現中規中矩，跑獲一席殿軍，翌仗轉戰泥地即勝，沿途走勢明顯比前貫注及規矩，姑勿論係加佩面箍嘅關係，還是成熟程度突飛猛進，總之一轉場地就掂，贏開之馬肯繼續跑食胡路程，一定要追。

　　「成就美麗」上賽差少少追唔到「新強勁」，輸了際遇畀頭馬，如果唔係出彎後佢在外檔蝕位上前，人哋喺內欄博位，賽果可能改寫，如果今場發揮無誤，當然具爭勝分量。此外，「一定快」近仗草地成績較理想，但本身喺泥地賽起家，而同場多駒各有缺點，佢就位好及輕磅，有權爆冷。

Jack