馬主論戰

猪拉多纳

電訊超星必拼

　　我有一位來自北京嘅朋友郭飛嚟咗香港，今日我會招呼佢同太太一齊入場，咁啱頭場我隻「電訊超星」有份上陣，希望呢位老友可以帶嚟好運喇！

　　講番「電訊超星」，落到五班點都有多少着數，而柏寶試過之後亦話弗，希望可以贏番一場。至於同場隻「電訊至尊」，狀態亦返咗嚟，如果我哋兩兄弟呢兩隻馬一Q返嚟，咁就最理想。另一匹心水鍾意「開心指數」，響四班跑泥地有力再贏。

張敬山

好中煌轉倉即搏

　　告達理剛啱憑「玉峽生輝」同「高風格」兩匹冷馬起孖，手風真係順到不得了，今日一於再捧佢啲馬。推介頭場「豐盛之星」，近兩場都係輸個幾馬位，已經試準晒走勢，韋達肯再效力應該有計，隨時可以開齋贏馬。

　　另外鍾意第四場「好中煌」，上季響直路賽一出即勝，質素肯定唔曳。今季跑咗兩場冇表現，即刻轉咗去告廐，睇嚟幕後都心急想贏馬，今次轉倉初出要吼實。

任達華

吼郭能財神駕到

　　郭能同姚本輝剛戰攜手爆咗隻「鐵胆龍」，兩人依家正處蜜月期。今日呢對騎練合作兩駒，梗係要捧場喇！

　　先講第六場「財神駕到」，上場輸條頸畀「精彩遊戲」，只係差啲運氣，今次轉跑泥地再遇後駒，應可報番一箭之仇。

　　至於尾場「相見歡」，季內七戰雖未交代，但上仗響泥地1200米已輸唔遠，今次落番二班作賽，如果肯搶放操控步速，唔一定冇機會偷雞，遇冷勿忘。

寇鴻萍、梁廷鏘