小宇宙坚旺财大家胜利名马 山顶叻叻仔创出商机神圣驹

猪拉多纳

　　今日十场赛事，因为唔少大马房齐齐大手派马，好多场合好似係热门马天下，至於，赛果係咪会咁利热门？！个别场合应该幾难爆得出样。

　　
　　望落幾大马房，蔡约翰及大摩比较多头马希望，唔排除有幾场都会係佢两个啲马拍拖咁返嚟。

　　「小宇宙」上赛前已指出改善了重口问题，结果赢得比预期劲，而缔速仲係当日草地赛头马之中，唯一比标準时间快，绝对有代表性。以此际进度升上叁班出战，仍是上风。

　　「名马」落败既因形势又气管多血，唔使介意，当然，要考虑之前跑得好，因一再係赛事受益者关係。「坚旺财」一早有拣开，唔係步速太慢，经常可於末段爆上嚟。「大家胜利」渐到水尾，希望早段少马走，可赚点形势跑近。「马上得胜」初出比预期失色，未必完全因沿途叁叠，可能未适应。

　　「中华宝宝」分数低过上季第叁捷，已经唔再吃力，加上，呢批对手已是近仗最弱一次，係时候郁手。

　　「得运欢笑」落四班後表现唔算特别，可能重磅或路程问题，今仗整体条件係较好了。「雅趣」除罩转到谷草一哩，喺出闸慢及外叠蚀劣势下，末段唔係冇得湧，而今次加程应有利，如出闸反应和际遇唔同，成绩或可突破。「勇先生」跑法可能会赚，但材料有限。

　　「日月霸王」上赛前曾发忟憎，又第一次跑泥地，仲要一直冇遮挡，返到终点只输少少，睇嚟转场地叻好多。

　　「快马当先」和「光芒四射」，内档预咗赛事中有利。「兵奇临」13档要睇早段如何摆位，但严格来说，上赛末段比想像中冇衝得咁强。「天下宝」脚伤後隔幾日复课，之後工序可以加压，唔应该有问题，交得出泥闸走势，拉士一定有佢份衝。「兄弟齐心」和「冰火」衰在外档不易克服。

　　「山顶」幾个大闸试来吸引，速度够而走规唔算嫩水，如果唔係睇得唔打得，初出已够争。

　　「叻叻仔」落班变了与一大堆BB对战，对手级数与上赛差天共地，重磅都让得起。「齐歌唱」工夫曾有阻窒，影响有幾大要估。「神圣驹」缺点係易抢口，尝试转配件及缩程，可能有帮助。「惊雷」及「创出商机」，初出俱输近，论走规及末段馀势，後驹稍讨好。

　　「育成王子」阵中仍见两头片，靠质一出即胜，如果进度略进，加10分根本冇压力。「善寳」上场亦係以级数赢马，属前驹劲敌。

　　「博爱福星」回到此程，往绩够硬净。「明兴宝宝」及「超级精神」，实力与前3驹有距离，但此程赛绩稳阵，或可争叁叁四四。

　　「翡翠明星」排13档，唔容易有番上场有利处境，要博早段泊得好位，同埋，加程後气量问题。　　

　　「魔幻大师」在1200米路程搏到差唔多，回到中程係最後一着，而本身跑法段段有，排中档起步冇影响。

　　「好好彩」前仗跑法完全唔同，当时仲係初跑此程，可後上入P，表现並不简单，隔了一场谷草「外遊」败仗，转场勿轻视。「伽罗」点都喺末段有衝刺，却经常唔出头而已。「好得意」对手级数係季内最水皮一场，唔係低潮期，重磅亦有得争。

　　「傲男」有可能继续赚慢步速，只加1磅再战，对手又冇大分别，唔觉有阻力。「财宝鹰」及「爪皇豪火」，如不是受制赛事环境，本有一定胜望。

　　「怡胜」二班以下喺此程跑3场赢晒，如外档加马伟昌，唔係跑到错晒，有权爆。「同个世界」跑落冇预期进展，但係咪上场地慢关係，今场可了解。「欢欣满载」表现好坏关键係练者「心态」。　　

　　「醒目精英」之前赢同程係季内缔速最快头马，实力有晒證明，隔了两场有藉口解释败仗，留放做得好，随时返嚟。「花月春风」初出已拣，跑落符合预测，按理加程仲好。

　　「阳明飞飞」太準，从未失Q，就算此程掹掹紧，拖脚都要。「续领风骚」之前同程胜出，多少靠赚，级数在此略低了。「包装之宝」及「龙的王朝」，上赛唔係冇走势，加程稍有幻想空间。　

　　「梦幻十一」此程往绩少甩拖；「奇葩」今季演出够可靠，属今场四平八稳之马。

　　「超群如意」若不是外档，信心唔会冇，希望早段际遇理想，末段就会有得衝。「花月佳期」上赛大败，末段一滴都冇，太唔似真。「手风顺」档位内移，处境会比上赛好好多。

　　「好友福」目前可能短途比中程有把握，喺二班唔使负重亦着数。

　　「驌龙」热身一场，进度已不同，喺叁班唔应该遇到阻力，何况，跑长200米有机会仲啱。

　　「闪烁武士」及「夺金」，前景俱佳，而前驹加程必更好，後驹负轻磅，减低升班压力。

　　「天瞳」和「雨电风雷」，担心前驹搏得稍密，反而後驹场地正常，威力大不同。

马会赛马节目主持 洪礼贤