踏入二月手风顺 谷战信潘顿

猪拉多纳

　　之前苏狄雄，在踏入2月後，头马一匹接一匹，不过，近两期已经冇咗个势，但另一位好手潘顿，暂时仲係2月之星，因为呢个月赛事暂时跑咗六期，潘顿已经赢咗五期，而月头那次谷草夜赛更连中叁元。佢目前累积29场胜利，比起停紧赛嘅柏宝还要多，继续做紧旺人，今期坐骑卜满晒，相信有马赢嘅成数幾高。

　　虽然有时出马多唔代表实有W，但睇睇潘顿喺骑师王开飞後嘅赔率走势，一直压住韦达，佢嘅马差唔多隔晚全线有飞，除咗尾两场坐骑係十倍以外冷门，好多都係得幾倍嘅热门。

　　当中「阳光王子」、「幸运多宝」及「雪米糍」飞数幾劲，估计亦係头马希望所在，热就热少少，起到孖的话，亦有唔错回报。

　　「阳光王子」谷草未跑过，但有嘅係级数，尤其畀佢排到内档，对发挥好大帮助，预期在对手平平之下，有力出头。「幸运多宝」交畀潘顿，沈集成同佢向来老友鬼鬼，今季合作成绩有目共睹，所以，今场必会拼个明白。而「雪米糍」恨赢恨到发烧，上场中伏屈居阿二，人马表现已冇得挑剔，其实今场对手咪又係咁上下，有机会补中。Jack