厲行星錢健明威番次

猪拉多纳

由於尋日係港澳盃賽馬日，夥拍澳門代表「品自高」嘅前香港騎師錢健明就嚟到取得一日客串牌照，雖然佢只得沈集成兩匹外線坐騎，但呢位好手頭場就技驚四座，即刻靠「厲行星」先拔頭籌，攞到佢自1998年12月9日「班立高」後在港首場頭馬﹙2007年4月22日的「獎門人」被取消資格﹚，換言之足足隔咗十三年有多，而且呢場頭馬亦同成哥打破近一個月嘅頭馬荒，絕對係雙重意義。
       
厲行星發揮凌厲後勁，勝出頭場泥地1200米。
沈集成讚發揮出色

講開點解尋日兩隻馬用晒錢健明，沈集成就話「厲行星」嘅馬主姚景存一早想話用錢仔，同埋成哥話自己當年喺愛倫做副練嗰時，錢仔就做緊見習生，佢哋兩個喺嗰陣就識，所以佢一直都好想搵佢幫手，之前有一年打吡都想搵錢仔返嚟客串，點知馬會唔批，所以今次就藉港澳盃呢個日子同佢合作，依家仲可以贏埋馬，佢都好開心。至於呢隻「厲行星」，成哥就覺得呢隻馬明顯泥地性能好啲，今次刻意叫錢仔跟前啲，鞍上人就跟足策騎指示建功，佢都好滿意。至於下次「厲行星」搵邊個騎，成哥話希望到時白德民可以復出幫手啦。