熊英雄七成照贏

猪拉多纳

尋日第三場賽事，賽前焦點「熊英雄」與「龜兔競跑」單打獨鬥，但結果唔係想像咁簡單，「熊英雄」貴為上季最佳新馬，實力有保證，終於敲響季內勝鼓，反而「龜兔競跑」就走晒樣，無段好睇只係跑第五。
       
霍利時(左)、范邦初(中)、郭能(右)

「熊英雄」重拾昔日光芒，不過配搭就由柏寶換上郭能，據馬主之一嘅范邦初表示，由於柏寶早前墮馬養傷期間，霍利時恐怕佢復出狀態未弗，因此早已搵郭能接手，由於有承諾在先，所以最後佢都婉拒咗柏寶索騎，不過遲啲郭能返英國，柏寶亦都好大機會攞番個帥權。但係霍利時就話如果佢同鄉馬偉昌遲啲返嚟香港客串，佢就屬意搵番昌哥操刀。
       
暫攻直路賽

至於今次贏馬，范邦初亦話愛駒級數始終秤先，雖然早前遠征澳洲傷咗蹄甲，尚幸情況唔嚴重，今次贏馬，郭能賽後向佢表示隻馬只係七成左右，相信升班後仲大把世界，霍利時就話跑多場直路賽先至再考慮增程，預計下一場目標為下月21日的二班1000米賽事。