忽然转势 拣马闭翳

猪拉多纳

　　之前曾经讲过，来到季尾时分，赛道模式随时有变，譬如早排谷草B栏，或对上一期田草A+3栏，不论档位，又或是赛道偏差，均与季内已累积嘅模式数据有好大出入。係咪天气问题唔知？！係咪偶一为之唔肯定？！只知道呢类趋势喺季尾不时发生，赛前「度」嗰套，临场未必啱使！

　　压地後赛事模式大变

　　又好似日前周中夜赛，本来模式「相安无事」，大致上利前置、贴栏及靓档，点知跑完4场之後一经压地，排档差、跑法被动，以及抄出外档衝嗰堆，好多都搞掂（个别场次唔係因前中段步速快引致），因乜解究？的确难以理解，只知忽然转势。所以，嚟紧三两个月嘅赛事，小心类似情况突然杀到。

　　讲开周中赛事，韦达连场入围，整体成绩算係对得住客仔，像「红日」轻胜返嚟，或「一宝」後上入Q，都係靠佢阵中发挥得好，先至有成绩交出。不过，同晚处理「尊胜福星」手法就唔多啱数（赛後验唔到有问题，暂未知翌日有冇病痛验到），虽然话前两段步速稍快，韦达喺对面直路冇再「质」，完全可理解，但前中段积极性的确不如上仗骑者劳爱德。由此亦带出，会唔会係隻马放得唔够尽情，跑得冇咁畅快情况下，令到之後竞逐心理有损？！係咪凭空想像，其实冇答案，不过，呢匹马两W係由头带到尾就係事实。

马会赛马节目主持  洪礼贤