谂多无谓 未必实际

猪拉多纳

　　从来对骑师们拣骑、弃骑嘅睇法唔会好强烈，同场之中，一位骑师捨幾驹而就，未必代表甚麽！因为我地係局外人，唔知当中因乜解究出现拣骑或换将情况。譬如，某驹唔係A骑师唔想骑，因向来与同场B驹练马师关係好，推唔甩聘约焗住上。又可能某驹马主（或练马师）意願，想换人一试，A骑师恨到发烧一样冇得再跑，策骑权不得不落入他人手中。

　　又唔排除某驹刚由C骑师赢完，本已口头承诺下次再搵佢，点知再出之日，同场有匹嫡系坐骑又出，佢得一个屁股，分身不遐，咁那匹嫡系坐骑或因而换人。係咁意谂谂，已经有唔少促成赛驹换骑师可能性。其实，成因仲有更多更多唔同「组合」存在，所以，太过一厢情願去「度」某骑师拣骑，最终会中计定係中彩，冇得写包单。

　　回看刚周日赛事，第三场潘顿赛前好似好多马拣，与佢有关连不下4驹（上场骑完或赛前曾操），此为「胜蹄飞」、「蜚声国际」、「财神驾到」及「时来风送」，结果佢嘅坐骑「胜蹄飞」，名次比起後两驹低。

　　又例如该日尾场，「利钱伯爵」、「华美之星」及「财运」都係与韦达有关係，前驹由佢策骑，可惜热倒兼名次大落後，回配郑雨滇嘅「华美之星」则获亚，係咪代表韦达眼高手低？！唔觉囉。

马会赛马节目主持 洪礼贤