高分贝分量十足

猪拉多纳

　　连日大雨，就算今日中午可能会停晒，场地一样会受到影响，加上，经常在周末赛期都会爆到唔清唔楚，令到呢期赛事更加难搞！唔好话阿栋长气，呢类变化地场合並不适宜大大注，小注怡情则属最佳时候，明明买开一百，都会缩至「幾草」算嘞。

　　第四场四班1600米。「高分贝」有变化地根据，黏软地跑两场俱入三甲，如果今日打水战，可以话开正佢嗰瓣！当然，场地正常佢亦唔拘，事实上，之前在三班好地一样可追入前列，更曾以短距离见负，计正今赛落到四班点会冇分量。再者，是场唔少马将会放头，对於後上跑法嘅佢，绝对係好事，而话晒今季未交代，冇理由唔把握机会。

　　海钻石赛绩一流

　　第八场三班1200米。「海钻石」初出赢个幾身位，亚军「叻先生」再出成功补中，而该场季军「爱欢笑」乃新胜而临，可知头马水準甚有代表性！今仗来到三班角逐，对手係有唔同，不过，最恶嘅「山顶」已经退出，而「芙蓉之宝」要让佢12磅，未必冇得撼。

　　唯一考虑係大摩今季仍然未有连捷马出现，但阿栋唔信邪，希望呢匹「海钻石」係例外。

　　第十场一班1400米。「华美之星」前仗初配韦达，赢到好似识飞一样，唔知以为係「雄心威龙」上咗身，轻胜接近3个身位，须知道，二三名唔係一般三班马，末段完全冇能力威胁，真係犀利。呢次回到1400米，仲用番韦达，条件齐备，有望争取季内四捷。

　　陈华栋