免被揽炒另觅水泡

猪拉多纳

　　屋漏偏逢连夜雨、落笔打三更、行路打倒褪，都可以用来形容韦达！十二届冠军骑师今季表现时好时劣，莫讲话蝉唔蝉联到冠军，有时好似想佢跑好啲、做足本分亦唔係好得。

　　跑了11期赛事，在他手上输掉嘅热门多过便利店，暂时最热、捧到得12蚊嘅「崇山宝」跑唔赢、「山顶」梗颈四、「爱宝驹」得个P，未知阁下有冇落叠，但肯定祸延到好多马友，公众热门嘛，跑唔赢，点会冇深远影响！

　　韦达今季得一场大热W

　　赛事进行了接近两个月，韦冠军一共骑过23匹大热门，赢得一匹「劲势」咁大把，计「死亡率」的话，约为95%，冠军级骑师大热门胜出率竟然得幾个百分点，恐怖！就算係计上名率亦唔ok，一半都冇，肯定唔及格，真係唔知幾时先会有起色。

　　之前写过嘅柏宝，大 ／次热门马「死亡率」约为9成，势估唔到韦达更加「出类拔萃」。呢种极其反常现象，近季真係未试过，一个骑师係咁，两个又係咁，的确係异数。

　　低处未算低，不宜博反底。昔日马场大哥二哥，今季热门坐骑成绩唔多理想，仲要唔係三两期係咁，硬要幻想止跌回升，不如搵个第二个水泡，好过与他们「揽炒」，反正二人赢亲马亦唔会好分得好边，「捕」得中又如何，买盐都唔鹹囉。