喜逸值得憧憬

猪拉多纳

　　今晚谷草A栏赛事，柏宝缺席，唔知对赛果有幾大影响？不过，望落今期赛事各场形势，唔少场合都似係请君入甕，热门摊晒出嚟，但係咪真係稳稳阵阵，可能因人而异，未必冇得爆，之所以，今晚赛事对热门马要特别警惕，真係要左谂加谂至摆钱。

　　第一场第五班2200米。「更捷胜」搏极都唔赢，其实已经失望，季内初出一哩追唔切得第二，再出转程1800米，重戴眼罩，又係得个P，博呢匹马开斋，仲惨过追火车！呢次又改跑2200米，同场又唔係步速，如果再一次屈居人後，阿栋下次都係耍手拧头。

　　隔晚有飞

　　第二场第四班1200米。收到出面有啲「风」，呢匹「喜逸」被人看好，望望赔率，隔晚独赢曾经得4倍幾，又真係比预期热得多，其实，上场票数已经唔简单，廿幾倍跌至十幾倍开跑，唔係冇人「出过力」。

　　讲番「喜逸」上仗走势，唔算好特别，在外档衝唔起，只係跑得接近啫。但话晒上场第一次喺谷草，可期望今场会再跑好啲，值得憧憬。

　　第七场第三班1650米。「夺金」上场追得劲都冇用，但如果唔係直路曾经被其他驹窒碍走势，根本有权赢埋。呢次唔再排外档，跑法唔使咁被动，可以跟前守好位，直接令威力提升。虽然冇咗柏宝帮手，薛宝力一样够硬净，唔影响发挥，四岁仔如想争分，唔会欺场。

　　陈华栋