殘車冇油放生黑貓

猪拉多纳

阿布亂晒坑 想搵「軍刀」做教練

車路士啱啱先喺歐聯出局，嚟緊又要飛去日本踢世冠盃，出發前今晚仲要喺英超作客新特蘭，班「藍戰士」舟車勞頓唔在講，領隊賓尼迪斯唔想櫈都未坐暖就畀人炒，捧「世冠盃」先係續命靈丹，相對嚟講，今場聯賽反而冇咁重要，新特蘭有權偷雞，2.1倍「讓球主勝」抵捧。

（有線201及301周六晚11:00直播）
米基爾行為不檢停3場

賓尼迪斯接手車路士後，班球迷即刻怨聲載道，老闆阿布又點會唔知吖，最衰係賓帥唔爭氣，「揸車」後踢3場聯賽只得2和1負，搞到阿布諗住再搵第2個接手，有傳佢想請番前領隊格蘭做顧問，尋日又爆出驚人猛料，話阿布想搵依家喺車路士學緊領軍、仲考緊教練牌嘅舊將舒夫真高加入教練團，可見阿布真係輸到失晒方寸，搞到車仔立立亂，賓帥唔想做最短命領隊，真係要幫車路士捧番隻「世冠盃」沖喜吓。

正因為咁，車仔今鋪真係未必同你砌盡，就算唔講「世冠盃因素」，呢班波家陣士氣低落，費托表現時好時曳，夏薩特、奧斯卡杜斯山度士同桑馬達更踢到殘殘哋，就連之前同球證卡頓保炒大鑊嘅防中約翰米基爾，尋日又正式收到足總通知，因為行為不檢要坐3場波監兼罰款6萬鎊，即時執行，車仔連強陣都出唔到，今晚作客新特蘭真係好惡打，失分機會極大！
新特蘭地頭6戰僅輸2鋪

係，新特蘭今季成績都唔好得去邊，領隊奧尼爾所受嘅壓力亦唔細得過賓尼迪斯，不過「黑貓」喺主場出擊有一定戰鬥力，今季喺聯賽6仗主場有1勝3和2負，法國前鋒沙夏又可以復出，要喺地頭執番1分唔係難事，「讓球主勝」要捧！
頂占筍盤：新特蘭（讓球主勝）