雌狼3連勝弗爆摧殘「紫百合」

猪拉多纳

羅馬同費倫天拿今晚正面交鋒，呢兩班波嘅關係真係千絲萬縷，「紫百合」教頭蒙迪拿、球員大衞比沙路、阿古蘭尼同東尼都係羅馬舊將，今鋪交手肯定別具意義。「雌狼」呢期贏到開巷，迪羅斯又可以復出，照計要砌低防線漏洞多多嘅「紫百合」唔難，捧1.82倍主勝。

（開賽時間：周日凌晨3:45）
費倫大衞比沙路缺陣

睇睇往績，都差唔多成年未見過羅馬喺意甲連贏3場，雖然呢3場勝仗嘅對手只係拖連奴、佩斯卡拉同錫耶納，但咪忘記錫耶納超過成個月未失過波，羅馬上場都可以反勝佢哋3:1，證明呢支首都球隊係幾咁Fit。

反觀費倫近期戰績就比較令人失望，對住拖連奴同森多利亞都係失分收場，最弊係兩場波失4球，當中有兩球係輸突擊，意媒已經批評緊教練蒙迪拿嘅352陣式問題一大籮。中場大衞比沙路胞妹過身，佢已經返咗智利奔喪肯定唔會披甲，造訪有射手奧斯華度傷愈復出兼迪羅斯坐完波監嘅「雌狼」，仲邊會有運行吖？