艾沙拉維撐起AC

猪拉多纳

AC米蘭今季喺意甲演出失準，相信要從後趕上成為聯賽冠軍嘅機會唔高。不過「紅黑兵團」都要繼續努力，最低限度都要保住來季歐洲賽席位。今晚AC米蘭將會作客都靈球隊拖連奴，相信已回勇嘅「紅黑兵團」可於客場再添勝仗。今場客隊讓平半85水，上盤捧得過。

（周日晚10時開賽）

上周中歐聯AC米蘭就對俄羅斯球隊辛尼特，基於AC米蘭已經出線，因此當日教練阿里基收起部分主力，大紅人艾沙拉維亦只列作後備，臨完場前十分鐘先至落場輕舒腳頭。當打前鋒有充足時間休息，今場將以最佳體能狀況挑戰拖連奴後防。

今年AC米蘭於暑期轉會窗放走進攻重心伊巴謙莫域，令到艾沙拉維有更多表現機會。「小法老王」亦不負眾望，為球隊取得十二個聯賽入球。個人覺得AC米蘭係畀艾沙拉維一個人帶番起，今晚AC米蘭有佢幫手，絕對有能力挫敗弱勢球隊拖連奴。
施多夫打氣 必斬拖連奴

話拖連奴弱勢絕冇講錯，之前喺意盃以0比2輸畀錫耶納，上輪聯賽喺都靈打吡戰又淨吞祖雲達斯3隻光蛋。球隊現時處於低潮期，就算有主場之利都信唔過。賽前施多夫從巴西飛赴意大利米蘭探班，與AC米蘭球員聚餐兼打氣，相信對於AC米蘭爭勝有一定幫助。