新特蘭以逸待勞捉刺客

猪拉多纳

另一場「東北倫敦雙城戰」由新特蘭主場對熱刺，「黑貓」新特蘭踏入聖誕快車期張牙舞爪連贏兩場，強如曼城都成為佢哋腳下敗將，絕對唔嘢小。而且連續兩輪佔地利，對於球員體能調節，應付頻密賽程尤其關鍵。反觀熱刺連番作客，此消彼長之下，「黑貓」以逸待勞受讓平半，力捧下盤。 （有線300及200台周六晚8時45分直播）

新特蘭近兩場都小勝1比0，上仗贏曼城帶有幸運成分，但俗語有云好波不如好運，「黑貓」連運氣都有埋唔可以睇小。更何況踢聯賽最緊要係每場攞足三分，唔需要吓吓去到盡，否則到快車後期隨時後勁不繼，盞得不償失，領隊奧尼爾「煲魚生粥」策略正確。新特蘭現時踢起信心，要贏佢哋並唔容易。
熱刺往績冇着數

熱刺話就話上仗大炒維拉，但上半場咬唔入對手，只因換邊後維拉改變戰術，試圖進攻搶分，結果正中熱刺下懷。不過以新特蘭近四次主場三場不失波嘅穩健作風，相信唔會重蹈維拉覆轍。撇開上場贏4比0，熱刺之前三場只入兩球，攻力並唔算銳利。而且近七次作客新特蘭只係贏得一次，讓波未免太過火。