各適其適心急交代

猪拉多纳

今日列陣第七場嘅「各適其適」，相信好多馬迷都當咗佢係名氣馬，皆因上手馬主正係捲入受賄官非嘅前政務司司長許仕仁，唔知係咪佢早有自知之明，所以上季初一早已經向馬會申請將愛駒公開標投出售。
       

而「各適其適」畢竟係航哥一手引入，若然要轉倉當然可惜，所以練者當日極力游說旗下馬主落標投番呢匹馬，最終佢心願達成，結果由「明駿之寶」馬主鄧明同譚達明為首嘅紅駿團體接手，繼續交番畀佢打理。
       

不過「各適其適」跑到今時今日仲未贏過，相信連航哥自己都有啲失望，今季首戰仲墮馬，抖咗三個月先喺上場1200米復出，以為諗住跑短熱吓身，點知漫不經意都殺入一席，今次換上當旺潘頓跑番更啱嘅1400米，騎練近期賽事合作頻頻有佳作，睇嚟航哥呢份心思，都應該有回報。