勝利靠超新星獵殺鳳凰

猪拉多纳

今屆澳職多咗幾位球星加盟，的確令賽事生色不少，不過用高薪請星級外援，並唔係搞波嘅唯一出路，發掘新人亦都好重要！就好似墨爾本勝利今季就有超新星馬高洛查士彈出，呢位年僅21歲嘅翼鋒唔單止腳法出眾，仲有超級重炮傍身，絕對值得留意。今日墨爾本勝利主場迎戰威靈頓鳳凰，小弟好期待再睇馬高洛查士嘅演出，1.65倍主勝可以信賴。（有線64及204周六下午4:45直播）

墨爾本勝利今季成績突出，馬高洛查士嘅表現尤其令人印象深刻，前仗主場以3:2贏紐卡素噴射機一役，佢就入咗兩個超級金球，人氣一時無兩，當地傳媒更形容佢係「澳職史上最佳新人」！不過佢同「勝利」張合約嚟緊4月就完，當然想趁機會去歐洲搵食，趁住1月轉會窗重開，呢位新星都會繼續表演「科騷」，一於為前途而戰。
鳳凰擺大個頭防線不穩

威靈頓鳳凰早前打正旗號要踢「全能足球」，希望以高速攻守加上強勁體力去對抗列強，但似乎講就無敵，做就無力，就連後衞杜蘭迪賽前都承認隊波仲未搵到個平衡點，強行排出「433」陣式，結果就令佢哋近5場聯賽失咗10球！最弊係前鋒伊菲爾受傷要抖成個月，兵源買少見少，今場作客都係信唔過。

頂占筍盤：墨爾本勝利（主勝）