AC新鐵三角強爆祖記

猪拉多纳

意盃8強重量級大戰！

意大利盃8強今晚會由班霸祖雲達斯同AC米蘭合演超重量級大戰，雖然話祖記今仗有主場之利，但佢哋受傷兵同體力問題影響，面對住決心爭盃兼有進攻三條煙愈夾愈熟嘅AC，「斑馬兵團」未必贏到，梗係捧2.18倍「讓球客勝」啦！

（now633及660台周四凌晨3:45直播）

論實力同今季表現，「斑馬兵團」應該都係秤先一隊，不過，佢哋歇冬後忽然走樣，周日對森多利亞場波，喺接近1小時要打少1個，最後輸咗1:2勝勢終止，唔止士氣受損，依家小休3日又再出戰，對經過聖誕新年休假後，狀態有多少跌Watt嘅球員嚟講，話唔攰就呃你嘅。

再者，祖記中場卡華禾艾沙姆因隨加納備戰非洲盃缺陣，中場重心馬治斯奧亦加入埋十字軍，同守將基亞連尼齊齊養傷，陣容不整，就算有地利都唔係話贏就贏o架！
阿里基保飯碗盃仔照殺

AC呢邊，之前2:1小勝錫耶納，表現討好，前鋒保贊同柏仙尼近2仗各入2球，配合埋「新舒夫真高」艾沙拉維壓陣，呢個新鐵三角火力絕對唔可以睇小。更重要係，佢哋今季聯賽爭標機會唔大，家陣已經落後「一哥」祖記17分，喺歐聯16強又抽中下下籤對正巴塞，隨時又會提早畢業，主帥阿里基想交代，呢隻意大利盃仲點會肯放過吖？考慮埋佢哋近4次出訪祖記竟然錄得3勝1負佳績，今晚受讓出擊，當然抵玩。
意盃賽制

今輪為8強戰，以一場過分勝負，若法定時間內打成平手，需加時作賽，再和就互射12碼決勝。