祖記請拉素食魚生粥

猪拉多纳

今晚意大利盃4強首回合有祖雲達斯主場迎戰拉素，雖然派路仲未知出唔出得，但有「新人王」保羅普巴壓陣，「斑馬軍團」想喺主場先拔頭籌，小勝近況頗佳嘅拉素唔係難事，小妹覺得3.45倍「讓球和」值捧。

（now633及660台周三凌晨3:45直播）
新星保羅普巴光芒四射

保羅普巴上仗聯賽射入兩球世界波，幫「斑馬軍團」大炒烏甸尼斯，賽後更獲教練干地比作「新列卡特」，證明佢離開曼聯絕對正確！小妹最欣賞佢唔似得某啲所謂天才球員咁自負，講明一定會繼續進步，有佢拍住愈戰愈勇嘅馬特尼同維達爾，夠晒班帶領「祖記」小勝而回。

連續15場不敗嘅拉素絕對唔易食，呢隊波喺高路斯養傷後火力明顯減弱，但防線始終唔係咁易擊破，雖則拉素喺上場聯賽畀巴勒莫攻入2球，但睇番之前嗰12場聯賽，每場最多都係失1粒，小妹相信佢哋今仗唔會輸得多，甚至取得作客入球，就可以等次回合返主場再爭入決賽。
意盃賽制：

採主客兩回合淘汰制，今輪為4強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊憑作客入球優惠晉級，若加時沒有入球，則需互射12碼決勝。