喜鵲神奇不再 維拉護級歎私房菜

猪拉多纳

英超今晚有阿士東維拉迎戰紐卡素呢場護級大戰，主隊喺盃賽接連出局雖然羞家，但神奇不再嘅「喜鵲」亦淪落到要護級，既然維拉不嬲恰慣「私房菜」紐卡素，平手盤都係捧1.9倍主勝啦！

（有線204、304周三凌晨3:45直播）

就咁睇近況，阿士東維拉同紐卡素真係難分高下，維拉3日內喺聯賽盃同足總盃，先後畀巴拉福特及米禾爾踢出局，近6場聯賽更只得2和4負，堪稱昆士柏流浪以外最霉嘅球隊！不過依然獲得球迷力撐嘅領隊林拔就講明今仗會全力出擊，意味住上場足總盃休戰嘅主力賓迪基同艾邦拉荷都會復出，「喜鵲」未必可以應付。

另一頹軍紐卡素上季勇奪聯賽第5名，但今季居然係唯一一支英超作客未開齋球隊，就算一炮過收購咗包括恩加麥比華在內嘅4件法國兵救亡，班新兵都未必咁快適應到英超節奏。睇埋往績，「喜鵲」近8次造訪維拉只係贏過1次咁大把，畀人剋住仲想打破不勝走勢？下場請早喇！