熱刺收晒火放生「法國喜鵲」

猪拉多纳

今晚英超頭場上演熱刺主場鬥紐卡素嘅精彩戲碼，前線人腳不整嘅熱刺火力減弱，今晚好難食硬回勇嘅「法國喜鵲」，一於捧2.25倍嘅+1「讓客」啦！

（有線200及300、廣東體育周六晚8:45直播）
紐卡素法國兵有料到

熱刺呢排都唔知行咩衰運，繼辛度雲尼亞里提早收咧，就連迪科爾都話要抖三個星期，搞到領隊保亞斯焗派啱啱踢完非國盃嘅艾迪巴約打正選，不過老實講吖，喺南非咁遠水路搭長途機返倫敦，「多哥王子」嘅狀態係點真係冇人知，火力冇保證，憑咩讓波呀﹖

係，熱刺掟咗筆錢，等史浩克04中場賀治比提早加盟，不過呢位德國小將初到貴境，想佢好似幾位紐卡素新兵咁即時融入球隊，都真係有少少妙想天開，喂，人哋「喜鵲」嘅迪保治、高法蘭同穆沙施素高一嚟到就交到貨，好大程度係因為佢哋全部係法國兵，紐卡素陣中又有卡比耶、奧巴坦同賓艾化呢啲「同胞」，先可以磨合得咁好，尤其係穆沙施素高，處子戰即梅開二度拆「車」，堅有料到，有佢拍住同屬法語系嘅柏比斯施斯攻堅，紐卡素贏埋都仲得啦！