車仔訪布拉格難作惡

猪拉多纳

丹巴巴亞唔出得焗用「廢」托

成為首隊衞冕歐聯冠軍喺分組賽就出局嘅車路士，今晚起就要降格展開歐霸盃之旅，32強首回合出訪捷克布拉格斯巴達，表面睇嚟大蝦細，查實係危機四伏至真。車仔近況唔算突出，已經連續4場作客未贏過，加上射手丹巴巴亞唔符合上陣資格，前線又要靠「廢」托掛帥，對住歐戰主場勁爆嘅布拉格仲點讓波？我捧2.12倍「讓主」。

（有線64及204、廣東體育周五凌晨2:00直播）

雖然車仔啱啱砌低韋根，終止連續4場不勝走勢，不過講到狀態始終都信唔過，特別係主帥賓尼迪斯出晒名鍾意玩輪換，臨場出多幾個副選就認真大鑊。賽前佢仲衰到話因為以往自己帶利物浦對住車仔太勁，所以永遠贏唔到球迷歡心，把口咁衰，睇怕就連球員都頂佢唔順。
施治手指骨折紮住上

由於射手丹巴巴亞因為上半屆幫紐卡素踢過歐霸盃，註冊唔到，前線搞到又要用射極唔入嘅費托，入球能力都幾難令人放心。至於防中位置，近排愈踢愈好嘅大衞雷斯又要停賽，約翰米基爾就啱啱踢完非國盃返嚟，應該會先任後備，想搵個信得過嘅都冇，最慘係中堅泰利會繼續缺陣，門將施治雖然會帶傷上陣，但佢前排手指骨折，痛起上嚟有甩漏到時怨得邊個？
布拉格歐戰主場11戰不敗

布拉格斯巴達呢邊，喺佢哋嘅列拿球場上場真係惡到飛起，單計歐洲賽已經連續11場未輸過，喺今屆分組賽亦繼續保持威勢，強如里昂嚟到都只係踢和1:1，狀態麻麻嘅車仔都未必搵到甜頭。佢哋個20歲新星前鋒卡歷克喺分組賽入咗4球，有力衝擊車仔防線，加埋仲有捷克國腳查洛錫倒戈壓陣，憑地利爆冷頂得住唔出奇o架！
布拉格打歐霸盃旺入球細

對於車路士嚟講，歐霸盃重要性始終唔高，今場未必會全力出擊，加上最近作客成績一般，今場都係小心至上，留番主場先搏都未遲。對手布拉格斯巴達今季喺歐霸盃主場曾打和法甲勁旅里昂1:1，可見實力唔差，今戰未必會一面倒。翻查紀錄，佢哋對上3場歐霸盃全部開細，一於支持佢哋繼續「細」水長流，撐1.8倍入球細。
車路士入波靠林伯

‧布拉格斯巴達主場11場不敗。

‧布拉格斯巴達近5場歐霸盃不敗。

‧車路士近4場作客不勝。

‧車路士中場林柏特連續3場入波。