紫百合雙箭頭攻堅得「米」

猪拉多纳

「紫百合」費倫天拿雖然近況麻麻，但係勝在主場夠硬淨，今晚佢哋喺意甲地頭迎戰近期作客例腳軟，兼上周中歐霸盃全力出擊嘅國際米蘭，憑住東尼同祖維迪呢對「紫百合雙箭」足以摧毀對手，1.82倍主勝手到拿來。

（開賽時間：周一凌晨3:45）
國米近8場作客7負1和

「紫百合」喺1月頭畀佩斯卡拉打破今季主場不敗金身後，隨後6戰1勝2和3負，睇落狀態相當麻麻，不過再仔細啲睇，佢哋輸嗰3場其實全部都係作客賽事，由此可見就算班波狀態稍有回落，主場威力依然Keep到。再者今場除咗有中場核心阿古蘭尼坐完兩場波監復出，PSG借將、司職防中嘅施素高亦有機會落場，中場實力增強，配合埋祖維迪同東尼喺前線搵食，入波易如反掌。

另邊廂嘅國米，雖然喺聖西路擊敗基爾禾後，成功終結咗連續5場不勝走勢，不過佢哋上周中歐霸盃主場鬥克盧日搏甩髀，今晚班球員嘅體力未必恢復得切外，最重要係佢哋嘅作客成績亦未見復甦，自從舊年11月起8場未贏過不特止，其中7場仲要輸波而回，叫人點信得過呀！