車仔食得唔嘥 勢炒布拉格

猪拉多纳

車路士喺歐霸盃三十二強次回合回師主場迎戰捷克布拉格斯巴達，車仔今季聯賽水準極度不穩，但喺今屆歐聯分組賽士哥數字冠絕同儕，降格打歐霸盃有如虎入羊群，首回合班兵行住踢照贏，盡顯兩隊級數分野，今戰有力大勝一場，熱捧「讓球主勝」！

（有線64及204台周五凌晨4時05分直播）
主場贏弱旅例數到盡

車路士今屆喺歐聯早於分組賽畢業冇晒飛士，但佢哋六場波轟入16球，數字冠絕歐聯列強，火力仲勁過巴塞。車仔喺分組賽兩戰同組弱旅洛斯查蘭特轟入十粒，炒弱旅有一手，今次對住另一支歐洲三線球隊布拉格斯巴達似係大炒格。事實上，車仔今季主場一係唔贏，贏得就多數贏兩粒或以上，十一場主場勝仗就炒八場。車路士「新魔獸」丹巴巴亞曾代表紐卡素出戰歐霸盃，唔可以再為車仔上陣，前面要用番腳風長期唔順嘅費蘭度托利斯，點都會削弱攻力o架喇，但對手咁弱，唔怕啦！

睇番首回合戰況，車仔踢落唔多肉緊，前線費蘭度托利斯保持一貫水準，繼續喺前場行行企企，不過大軍始終質高，最終仍憑後備兵奧斯卡杜斯山度士一箭定江山，純贏級數。布拉格斯巴達喺主場出擊都冇料到，前線鋒力疲弱，佢哋家陣落後一球，差距唔大，去到史丹福橋球場理論上仲有機會反先晉級，但呢班波有幾多料大家心中有數喇！