泰維斯成秘密武器

猪拉多纳

記得以前睇藍色生死戀真係可歌可泣，明明知係重磅催淚都要睇完又睇！而今晚英超同樣上演「藍色生死戰」，兩位領隊賓尼迪斯同文仙尼，最後下場隨時比元斌更加慘烈。雙方要同曼聯爭冠軍真係得啖笑，但皆因後上球隊個勢亦都非常兇狠，兩隊都同樣要搶分保前四，小妹今晚就撐主場嘅曼城。
近十次7破車仔

曼城除有主場之利外，另外都以逸代勞，上周中冇賽事外，就算講緊上周末，都只係輕輕鬆鬆贏場足總盃。相反客軍車仔真係好輸蝕，上周四晚先踢完歐霸，過程仲要唔簡單，體能點計都已經蝕底大半。

「藍月亮」早前成績好差，年初文仙尼仲話追曼聯冇問題，今時今日連紅魔車尾燈都已經見唔到，始終幾位主力如托尼兄弟離隊參加非國盃，對曼城成績有嚴重影響！但今晚文仙尼就可以派強陣出戰，仲要佢哋對倫敦球會往績甚佳，對上十次都可以保持不敗。

文仙尼仲有秘密武器，就係冰封已久嘅泰維斯。泰維斯最近態沉到後備上陣都唔多，但上場足總盃對列斯聯就打破個半月入球荒。點解話佢係秘密武器？原來佢近十次對住車仔射入7球，睇嚟對住施治特別有心得！

再睇番賓尼迪斯手上得近態較差嘅丹巴巴亞、同埋百鬧都唔成材嘅費蘭度托利斯，要射破赫特真係唔易。