碧咸PSG處子戰 強細出擊

猪拉多纳

好波3連發 香港冇直播

世上好波何其多，香港嘅電視台偏偏冇直播！作為一個「足球狂迷」，當然想跟緊偶像、愛隊比賽，即時知佢哋踢成點啦，但即晚3場大波都冇直播，其中碧咸首次披起巴黎聖日耳門戰袍、於法甲處子亮相大戰馬賽勁吸引，但本地「咸躉」卻無緣直擊；而「米蘭打吡」咩戰況、邊隊捧英聯盃電視都冇得睇，真係冇陰功囉！

千呼萬喚始出來，萬人迷碧咸終於有機會上演法甲處子騷！周一凌晨國家打吡巴黎聖日耳門（PSG）主場鬥馬賽，碧咸會否上陣固然係焦點，不過賽前有報道指聖日耳門王牌射手伊巴謙莫域有傷上陣成疑，加上馬賽前鋒佐敦阿休仍要停賽，今仗未必會出現預期中嘅對攻局面，波童建議捧細盤。

（周一凌晨4時開賽）
大哨朗拿度主持開球禮

碧咸會否正選上陣仲係未知數，不過球會今場特別邀請碧咸前皇馬隊友「大哨」朗拿度主持開球禮，而且賽前宣布下季開始轉用新會徽，咁多搞作，無非想強調對碧咸既重視，相信教練安察洛堤無論如何都會畀番多少上陣時間佢。碧咸加盟日子尚短，演出好壞未必對球隊表現有決定性影響，反而王牌射手伊巴謙莫域近況更值得關注。呢名瑞典國腳早前於歐聯對華倫西亞領紅牌，本應可以專心聯賽搏殺，可惜佢喺上周對索察時受傷，今仗未必可以趕及投甲，另一位近期獲得高度評價嘅巴西小將盧卡斯洛迪古斯亦因傷可能休戰，加上翼鋒文尼斯續倦勤，前線進攻火力隨時大減。

馬賽上仗靠洛芬尼完場前絕殺，一球小勝華倫西恩斯終止三場不勝頹勢，更可喜係防線冇失波，係歇冬後比賽首次保持清白之身。由於前鋒佐敦阿休兩周前對伊維恩被逐停賽兩場，今場續缺陣，加上作客出戰，預計會先穩定後防，踢法會較保守。基於雙方前線都唔齊腳，而且國家打吡大家都會踢得較謹慎，波童認為入球細係唔錯嘅投X選擇。