萬人迷被寸冇料到 PSG炒「賽」幫碧咸出頭

猪拉多纳

「萬人迷」碧咸巴黎聖日耳門（PSG）首演，今日開騷！儘管消息指咸爺喺今晚PSG主場對馬賽場法甲「國家打吡」會先任後備，但PSG一樣隆重其事，特登搵前球王「弗哨」朗拿度做今場波開球禮嘉賓，搞咁大台戲梗係對今仗信心十足啦！實力同氣勢都贏晒，聖日耳門1.86倍「讓主」穩陣啦！（開賽時間：周一凌晨4:00）
搵弗哨做開球禮嘉賓

PSG日前宣布，搵咗巴西傳奇球星朗拿度為今場主持開球禮，話要表揚佢喎！講真，就連當地傳媒都抓晒頭，「弗哨」又冇踢過PSG，無厘頭搵佢嚟為乜？講到底，咪要谷起今場波，搵佢配襯碧咸，吸引全球球迷目光囉。

搞咁大場騷，PSG斷估都唔想失威啩？雖則話佢哋上輪聯賽不敵索察，13場不敗走勢斷纜，不過力奇就認為呢棍當頭棒反而令班波醒一醒，有助更加集中往後嘅賽事。事實上，計實力PSG家陣已經係歐洲一線，返到法甲實屬超班，何況今晚佢哋仲會有後防重心堤亞高施華休戰7場後復出，陣容完整，加埋碧咸「七旋斬」做後備殺着，要大勝一場有幾難？
馬賽近3季作客巴黎輸晒

嚟緊下周三仲會喺法國盃再鬥PSG嘅馬賽，踏入2013年表現令人相當失望，至今各項賽事合共8戰得3勝3和2負，今場仲要冇咗前鋒主力佐敦阿休同中場班諾特捷奴，陣容不整，加上近3季作客巴黎又全部輸晒，今晚憑乜去砌？

賽前馬賽首席前鋒阿休仲要寸爆話，細個睇住碧咸踢波，但從來唔當佢係偶像，至於另一個英籍借將祖爾巴頓又話睇死碧咸嚟到巴黎冇前途，咪話力奇睇佢哋唔起，講級數，佢兩個都差咸爺唔止兩、三班，今晚一於睇住PSG大炒馬賽，教訓呢兩個無禮後輩。
PSG主場近8戰7勝1和

‧馬賽近3季作客巴黎聖日耳門全輸。

&#8231SG近6戰錄得5大1細。

&#8231SG近8主場戰得7勝1和。
馬賽頂唔住 玩埋半場主勝

PSG無論狀態同質素都較馬賽優勝，3分應該穩執，只係1.41倍主勝嫌冇肉食的話，博「讓主」又覺得有風險，唔啱你心水的話，大家或者可以考慮追瓣1.97倍半場主勝，事關馬賽近3季出訪巴黎，全部輸晒之餘，仲要連半場都頂唔住o架！