闊袍大袖換人坐正

猪拉多纳

　　第六場第一班1650米。「安穩」一連3場輸完再輸，唔係發揮出現問題，就係賽事形勢不利，而比較跑得好喺前仗二班一哩，可能由於排內檔，出閘後騎師過於老定，以為可以唔耗力就霸到靚位，點知一堆馬瞬間湧在前列，「安穩」被迫愈拖愈後，直路彎更被推出最外檔，在前中段步速慢情況下，末段鬥爆唔係佢嗰瓣，尚且有獎金算及格。

　　若果認真比較今仗與前仗賽事水平，呢場一班賽好似名大於實，當中5駒首次跑谷草（其一在港初出），就算從未跑過一班賽嘅「安穩」，形勢唔見得會處下風，何況，負111磅更可提升能力；怕且今場前中段唔會快，外檔起步令騎師積極爭位，或帶來良性影響，如享受到慢鬥慢之局，應有三甲。

　　第七場第三班1650米。「闊袍大袖」終於再上名，至少證明腳傷冇令能力大打折扣，三班仲係有得爭。雖然唔知咩原因換人，但鄭與韋同屬此馬好拍檔，轉騎師唔應該係弊處，路程專家一旦進度重上，又唔使負重磅，預期威力遠比上場勁，有力坐正。