皇馬最強刺客 「大」戰巴塞球王

猪拉多纳

西班牙國家打吡又嚟喇！繼周中西盃4強次回合後，皇馬今晚回師西甲，喺巴拿貝主場再戰巴塞。「地上最強」喺聯賽榜拋甩皇馬16分，冠軍9成落袋，雖則佢哋今晚會收起沙維同法比加斯，但都仲有美斯同韋拿數胡，另邊廂嘅皇馬係就係唔出C朗，不過佢哋仲有「最強刺客」華拉尼披甲，前線又有卡卡同希古恩等好手，要入波唔難，1.48倍入球大夠晒穩陣。

（now632台及中央5台周六晚11:00直播）

今場波重要性相對較低，但兩大宿敵對決，為面子肯定搏甩髀。近年每次國家打吡，話題都離唔開C朗同美斯，不過，今晚情況可能會有啲例外，因為皇馬下周中歐聯要鬥紅魔，賽前有消息指莫連奴會收起C朗，用番荷西卡利祖打翼，近期狀態唔錯嘅卡卡就擔正做指揮官，前線仲有阿根廷射手希古恩，齋睇呢個組合，鋒力已經夠晒保證啦！
莫帥唔出C朗 卡卡擔正

講到皇馬近期紅人，除咗C朗，一定要數到華拉尼喇。呢位法國小將中堅不嬲都唔起眼，但查實佢成個C朗+大衞雷斯混合體咁，近幾仗靠驚人彈跳力起晒朵，每次皇馬有死球，華拉尼都係冇乜人Mark，最近2次對巴塞佢都有士哥，堪稱「最強刺客」，唔惡嗰隊唔食，夠晒威水！
巴塞收起沙維 法比仔

啱啱周中喺西盃輸1:3嘅巴塞，係近年主場對皇馬輸得最徹底嘅一次，今晚造訪巴拿貝，當然想贏番鋪報仇，戰意毋須懷疑。可惜就上場所見，一對中堅碧基同佩奧爾有唔少甩漏，今仗想保住清白之身，似乎有難度。講到進攻，賽前《阿斯報》、《世界體育報》都話沙維同法比加斯都唔會落場，不過助教勞拉就覺得韋拿狀態一路都冒升緊，所以會畀佢踢正選，只要有呢位頂級射手幫美斯開路，要入波應該唔難嘅，既然兩軍對賽旺開大，一於追多鋪啦！
巴塞作客例有失波

‧連盃賽在內，皇馬今季主場未輸過。

‧皇馬近6次主場鬥巴塞，僅得1勝2和3負。

‧巴塞連續8場作客有失波，防線認真麻麻。