華倫搞寸碧咸騷

猪拉多纳

萬人迷再現歐聯 PSG缺伊巴難搞

今晚歐聯16強次回合，法國一哥巴黎聖日耳門（PSG）返主場迎戰西甲華倫西亞，碧咸重返歐聯舞台勢成焦點！聖門首回合領先2比1，佢哋一向靠伊巴謙莫域食胡，但呢位「瑞典神塔」首回合領紅今仗停賽，鋒力勢必大減，領先下未必冒進。況且「蝙蝠兵團」近八次造訪法國未嘗一敗，受讓半一博下盤。

（有線61及64台周四凌晨3時45分直播）

首回合對華倫時，伊巴謙莫域怒踩對方左閘古亞達度被逐，仲畀歐洲足協追加罰佢停賽兩場，今仗無緣上陣。伊巴對PSG有幾重要？「瑞典神塔」今季來投後極速融入球隊，於各項賽事轟入25粒，再睇埋佢班唔爭氣的前線拍檔，拿維斯、加美路、文尼斯、柏斯托尼加埋只係入得21球，相形見絀，亦映襯出伊巴效率驚人。
蝙蝠作客法國特醒

由於伊巴狀態弗到爆，若果冇傷冇病，教頭安察洛堤都好少輪換佢，變相令加美路、文尼斯等在冷宮雪到硬晒，要後兩者一出場即交到貨，實在強人所難。

聖門首回合作客贏2比1，lead住一粒下，又冇伊巴呢類能一錘定音的殺手壓陣，冇本錢強攻，就算有「萬人迷」碧咸自2010年後再次征戰歐聯，經驗豐富的聖門教練安察洛堤會小心為上，唔會冒進。歐聯係一個大金礦，華倫都想收復失地，兩大射手蘇爾達杜同莊拿斯干卡維斯近況唔曳，有力威脅主隊大門。

睇番資料，原來「蝙蝠兵團」自79/80球季於歐洲盃賽冠軍盃輸畀南特後，近八次作客法國球隊未嘗一敗，包括今屆分組賽以1比0擊敗里爾，數據硬淨，聖門讓到半一，純粹係名牌效應，下盤抵玩，另可留意埋細盤。
出線條件

●聖門贏或和均可晉級

●華倫贏1比0，聖門憑作客入球優惠晉級

●華倫贏2比1，加時

●華倫入3球或以上，以1球差距獲勝，憑作客入球優惠晉級

●華倫淨勝2球或以上均可晉級

首回合巴勝2:1
聖門中前場球員今季入球紀錄

伊巴謙莫域 25球

拿維斯 8球

加美路 5球

文尼斯 5球

柏斯托尼 3球
數讀歐聯

（3）華倫3次於歐戰淘汰賽首回合主場輸波，最後都未能晉級。

（8）華倫過去8次作客法國兵保持不敗，錄得4勝4和。

（9）聖門17次決戰西班牙球會錄得9勝，單計主場5勝2和1負。

（13）聖門曾13次於歐戰淘汰賽首回合作客贏波，最終全部成功晉級。

（22）聖門保持22場歐洲賽主場不敗，近7次主場出擊全勝。

猪拉多纳