花月佳期擺明車馬

猪拉多纳

　　今日沙田馬場十場草地賽，特別多新勝馬，為數十匹八匹，贏完係咪可以再贏？逐隻逐隻計，唔好一味以近績作為依歸，阿棟講過無數咁多次，賭馬注重賠率，過熱的話，千祈唔好焗住自己賭，寧作壁上觀。

　　第二場四班1200米。「珍珠有利」愈來愈進步，放頭走，或者後上一樣跑得接近，年輕馬漸已進入狀態。韋達目前為爭冠軍，跑馬好有心機，呢類剛呈上升勢頭之馬，佢一定重視，再追。

　　第三場二班1000米。「花月佳期」上次跑到氣管有血，大敗冇得好講。回顧前仗狀態不過初起，已經在此程入Q。今次用近期愛將馬偉昌，擺明出擊。而過去兩次角逐此程，唔贏也有第二，堪稱理想路程，由於與「小母牛」賠率相差太遠，WP值博。

　　好易搵三班冇阻力

　　第十場三班1400米。「好易搵」最近3場不勝有位，屬胡廐極少數成功例子，擺明為名而戰，以省靚招牌。目前留在三班作賽，唔會有好大阻力，而且與李寶利一連三場夾慣，路程又冇變，跑得出剛勝水準，有條件再勝。