同個夢想非池中物

猪拉多纳

　　今日有兩項一級賽上演，但凡此類大賽日，冷門通常閃埋一邊，熱門馬往往表現符合預期，是日正好係重注之時。當然，賭馬一定要量力而為，搏命還搏命，千祈咪「瞓身」。

　　第一場五班1400米。「電訊超星」最近3場賽事成績算係穩定，冇錯，贏完兩場都冇P，好似唔多進步，不過，今次最唔同係跑A欄，賽事或利後上，加上，今場應該早段唔慢，正合此馬發揮，希望早段留放好，忍忍埋埋爆一段，直路便有機。

　　神聖火炬三班夠爭

　　第三場三班1600米。「神聖火炬」之前在四班贏兩場，水準幾勁，唔相信三班冇運行，上場落敗，可能係新升班之過。

　　此駒有了1場經驗，期望會有進展，至於1600米勝任與否？未跑點會知，話唔定仲勁過1400米，如果獨贏有十倍八倍，博一博，冇頻撲！

　　第九場三班1200米。「同個夢想」初出田草1000米跑第四，前面大半途程處於包尾位置，最後幾百米那段後勁好犀利，睇嚟非池中物，三班起步好着數。

　　「同個夢想」在外地贏1200米，加程點會唔好，希望14檔唔會全程喺出便走蝕位，末段必可充分發揮實力。