希斯菲特打造「機動」瑞士

猪拉多纳

巴西世盃外歐洲區嘅焦點多數落喺德國、荷蘭、西班牙呢啲傳統強隊身上，但大家千祈咪忽視由希斯菲特執教嘅瑞士，憑佢嘅經驗同鐵腕執教風格，成功將國家隊訓練成一支運行到好似「瑞士鐘錶」咁精確嘅球隊，即使今晚冇佢臨場指揮，作客照砌低塞浦路斯。

上個禮拜提到愛華頓嘅莫耶斯，同依家要講嘅希斯菲特，都係球員會為佢搏甩髀嘅主帥。喺德國出世嘅希斯菲特，踢波年代大多數喺瑞士度過，佢以瑞士作為第二故鄉，5年前做埋國家隊教練，用實際行動話畀大家知，好嘅教練可以成為球隊靈魂！

希斯菲特鍾意用數理方法分析比賽數據，令到瑞士球員好有紀律性，分工明確。就算缺少天王巨星，但呢支以年輕球員為主嘅瑞士隊速度快，配合好，整體實力平均，喺之前幾場外圍賽中，已證明係同組實力最好。希斯菲特由於喺主場對挪威向球證「豎中指」被罰停賽，雖然今仗冇佢喺場邊督軍，但戰術運用機動化嘅瑞士，行「自動波」都夠對付差幾皮嘅塞浦路斯。