眼罩俠揸車 剷平卡山

猪拉多纳

歐霸盃8強 次回合開戰

大嗱嗱落後緊1:3，魯賓卡山今晚喺歐霸盃8強次回合返自己地頭出戰，當然想平反敗局，不過因天氣關係，佢哋要移師去另一個「主場」出擊，卡山喺呢個邪場踢波例冇運行，相反，車仔有「眼罩俠」費托當弗，平手盤當然捧得過。（有線61、64、201及203、廣東體育周五凌晨0:00直播）

魯賓卡山本身用開中央球場，不過鑑於喀山市呢排凍到甩轆，最低去到零下10度，歐洲足協早前派官員Check過，認為喀山市嘅天氣同中央球場嘅草地情況都唔適合作賽，所以安排今戰喺莫斯科嘅路斯尼基球場上演，搞到教頭比迪耶夫喊咁口。
魯賓卡山「邪場」出擊例衰

查實路斯尼基球場嘅容納人數足足比中央球場多5萬人，照計多啲球迷入場氣氛係好啲，不過路斯尼基球場面積就相對較細，比迪耶夫就話好影響球員發揮。睇番往績，魯賓卡山歷嚟歐戰22次主場出擊只係輸過3次，但3場敗仗正正喺路斯尼基踢，包括今屆32強次回合輸畀馬體會0:1場波，都咪話唔邪！況且佢哋近期表現勁飄忽，喺本土聯賽贏到辛尼特同莫斯科火車頭，但又可以失分畀古班同泰歷克呢啲中游分子，海鮮成咁點信得過呀？

對家車路士最近連挫曼聯同新特蘭重上軌道，雖然佢哋禮拜日會喺足總盃4強惡鬥曼城，加上會方視保住英超前四為首要目標，領隊賓尼迪斯前日已經向《天空體育》透露，會畀部分主力休戰。話就話半力，但查實一班副選好似域陀摩西斯同馬高馬連都有卡士，最重要係上場聯賽做後備嘅林柏特，以及戴咗個眼罩識變身做超級殺手嘅費托都會擔正，造訪受形勢所逼要焗攻嘅魯賓卡山，分分鐘贏多鑊甘都唔奇！

首回合：魯客負1:3
藍戰士專恰俄國兵

‧連同本土聯賽，魯賓卡山近8仗有7場開細。

‧魯賓卡山從未試過喺歐戰要用極刑分勝負。

‧車路士歷來歐戰5鬥俄羅斯隊伍全勝。
賽制

採主客兩回合制，今輪為8強次回合，設作客入球優惠，若未分勝負於次回合法定時間後加時30分鐘，再和則互射12碼決勝。