水手W不穩寧博大

猪拉多纳

打波最緊要係士氣，橫濱水手今季响日職開局5連勝，氣勢勁到爆，確實出人意表，但係從個會好多舉動去睇，呢個結果唔係偶然，只不過今日場（六）5佢哋主場對川崎前鋒，主W有成1.78倍咁好分，就令人有啲錯愕，都係改玩1.72倍入球大，以防佢連勝斷纜穩陣啲。
JR車廂貼滿球員海報

水手今季起步帶出，除咗班新人愈嚟愈成熟之外，關鍵係個會做咗好多工夫，凝聚一種團結氣氛，譬如早排佢哋就响JR車廂入面，貼滿晒球員啲介紹海報，帶動咗成隊波嘅自豪感。尋日，佢哋又同電訊商攜手，搞咗個「Sky Series」活動，催谷涉及水手、川崎前鋒、湘南比馬3隊嘅神奈川打吡系列，其中今日水手對前鋒場波，仲有得免費網上直播，對班球員自然會產生刺激作用，所以水手能夠開閘彈出，都要讚吓佢哋啲高層識做嘢。

好嘞，5連勝嘅水手今日對住來訪嘅前鋒，理論上實食冇黐牙，因為後者聯賽仲未開齋，排到去15位，遠遠落後「一哥」水手。但係點解足智彩開個主勝有1.78倍咁筍呢？就畀人一種可勝不穩嘅感覺嘞。老實講，前鋒爛船都有三斤釘，早兩日嘅日聯盃仲派啲o靚仔頂檔，擺明就係留力今場神奈川打吡搏殺，以佢兩隊响橫濱日產球場交手8成以上戰果開大嘅慣性去睇，博入球大保險過主勝。