中岸水手搏殺氹總理

猪拉多纳

澳職季後賽四強戰中岸水手主場對墨爾本勝利，上星期中岸水手去到中國出戰亞冠盃，對手係FC貴州。賽前澳洲總理吉拉德特登留言祝福中岸水手比賽成功，點知中岸水手唔爭氣輸波，搞到吉拉德冇晒「飛士」。中岸水手知衰，今場季後賽可以話不容有失，以免媒體大造文章令球隊甚或吉拉德再被取笑，今場主Ｗ一定要揀。

（有線64台周日下午3時直播）

足球向來都唔係澳洲主流運動項目，唔少人都質疑吉拉德點解冇啦啦會送上祝福，更有人話係政治手段。但點講都好，中岸水手唔輸都輸咗，依家惟有向前看踢好未來賽事。好彩今場對手墨爾本勝利唔係咁叻，中岸水手應可贏得漂亮。
常規賽曾炒勝利

論賽績，中岸水手喺常規賽彈甩墨爾本勝利成10分咁多，某程度已反映出兩隊實力有分野。其中一場重要指標係本年2月中岸水手曾經大勝墨爾本勝利六比二，今次再於季後賽碰頭，當然以中岸水手贏面較高。墨爾本勝利喺首場季後賽對珀斯光輝都贏得辛苦，依家對住實力更強嘅中岸水手，睇嚟形勢只會更差。