史篤城趁紅魔病搶分

猪拉多纳

小妹都算係半個影迷，睇咗咁多套戲，部分經典作到依家都仲記得啲劇情，《標殺令》絕對係其中一套。劉家輝師傅雖然只係客串一角，不過勁搶鏡。事隔10年，呢位武打巨星因為中風住緊醫院，瘦咗好多，小妹見到張相嘅時候，真係好心噏，希望劉師傅早日康復！

講開病，曼聯近排都唔知做乜，啲球員唔係有怪病就成日傷，費查有排抖就係人都知，影響亦唔算好大，只不過一對中堅基斯史摩寧同尼曼查維迪輪流打柴，就搞到紅魔原本已經唔穩陣嘅防線更加唔掂，上仗大家有眼睇啦，成班守將睇住阿古路表演，最終喺主場出擊都要以1:2不敵曼城，連埋早前喺足總盃被車仔踢出局，紅魔連輸兩場，狀態沉到冇朋友！
朗尼 尹佩斯陷入球荒

唉，咁又係嘅，大將朗尼差唔多成個月冇入過波，尹佩斯就仲衰，踏入蛇年後1粒都入唔到，堂堂曼聯冇晒鋒力，有乜法子唔輸波輸盤吖，講到底，球員都係人，家陣佢哋已經冇嘢好爭，聯賽又Lead住12分等封王，成班紅魔Hea遊球場在所難免，今晚佢哋造訪矢志搶分護級嘅史篤城，憑咩讓波先？而且史篤城主帥佩尼斯近日捉晒班球員照肺，逼佢哋交貨逃離降班區，鬥志贏曼聯幾條街，今鋪主場出擊有得受讓，一於冷冷地，博史篤城2.45倍「讓球主勝」啦！

推介：史篤城（讓球主勝）
幸福其實好簡單

上星期老友生日，小妹專登幫佢搞咗個驚喜生日P，使費唔多，但一樣令老友感動到眼濕濕，哈！所以話呢，開心其實好簡單，一班人聚埋一齊玩吓食吓，返到屋企見到家人平平安安，已經係一種幸福啦，Right？