池東沅有料到撐奧格斯堡

猪拉多纳

德甲冠軍已經塵埃落定，嚟緊嘅焦點就放喺歐洲賽資格同護級形勢上，今晚就有場由深陷降班漩渦嘅奧格斯堡，喺主場迎戰爭緊歐洲賽席位嘅法蘭克福。主隊嘅南韓中場具滋哲雖然因傷要抖個幾月，有排唔踢得，但好彩佢同胞池東沅1月之後加盟逐漸發揮作用，相信同樣可以帶起條鋒線，今晚要隊冧下半季走晒樣嘅法蘭克福，絕對機會樂觀，「奧堡」小讓平半要1.97倍上盤！（有線61、64、201及203周日晚11:30直播）
法蘭克福愈踢愈沉

奧格斯堡上季臨尾發力成功護級，具滋哲嘅入波同助攻起到決定性作用，今季佢多咗個好拍檔池東沅，早前佢就話同池東沅無論場內場外都好老友，有信心可以一齊完成護級任務。可惜具滋哲賽前因為腹肌受傷抖6周，不過單靠池東沅其實都信得過。「池仔」自從1月加盟，已經連續11輪擔正，球隊喺佢靈活走位帶動下，前線的確踢得醒神咗，結果喺2013年嘅11輪德甲攞到15分，為護級重燃生機，佢都有唔少功勞。

另邊廂嘅法蘭克福都要為歐洲賽資格而戰，不過佢哋唔係愈踢愈有，反而係洩緊氣嘅皮球，對上8場聯賽只係得1勝3和4負嘅差勁成績，齋睇近況似係護級球隊多過爭歐洲賽席位。法蘭克福咁嘅狀態作客奧格斯堡，仲要有正選門將奇雲托普手部骨折摺埋，真係想唔輸都難啦！

頂占筍盤：奧格斯堡（上盤）