海鑽石升勢未止

猪拉多纳

　　近日天雨冇停過，今日又要睇天做人！如果場地濕濕地，C+3欄賽事形勢比較險峻，事關賽道窄，群駒若然密集，直路有冇機會望空，真係各安天命。而今日我最睇好係大摩馬房，出馬唔多，貴精不貴多，據手足來料，呢期必然連場出手。

　　第一場四班1600米。「時來風送」實力差不多跑晒畀我哋睇，路程性能亦然，在四班唔係超級，又唔可以跑太短或太長，此程係最佳選擇。今場回到此程，碰到一批水鬥水原班馬，若果跑得出季初入Q時水準，今場邊度搵得到「首飾多寶」、「好主意」之輩。

　　第六場三班1650米泥地。「奪金」部署一步一步嚟，前仗由短途跑起，點知在1200米後追出色，初跑泥地可以咁叻，相信幕後都估唔到，再出跑草地1400米，志在維持運動量，當係一課大閘就得，唔好介意名次，以及陣上有冇追勢，因為路程唔合腳法。今場終於再增程，又轉回泥地，賀賢部署唔心急，經過上場先至嘗試一哩，輸完一場有10個開，抵買！

　　第九場二班1400米草地。上季早已指出「海鑽石」必上二班，雖然跑至上場才首次贏二班賽，姿態唔算吃力，睇個勢上梗一班。今次繼續跑二班賽，負磅唔加仲要減，條件幾筍，而此馬正值勇境，勝後準備又唔係有問題，大摩三雄，我最like佢。

　　點買法

　　大摩馬房今日有出擊手影，必須重視，尤其第九場出夠3匹好馬，好大可能打晒骰，所以，呢場買QT，阿棟會要晒該3駒，另外，加多匹未輸過「紅衣巨龍」，應該掂嘞。