阿仙奴打吡劫富

猪拉多纳

保老四玩歐聯

阿仙奴周中主場對愛華頓竟然攞唔足三分，話就話暫排第四，但後面只係少兩分仲要踢少一場嘅熱刺，對佢哋爭下屆歐聯入場券非常不利，所以「兵工廠」剩番嘅五輪賽事、包括對我愛隊曼聯，真係一分都不能失，今晚作客對住踢風流波嘅富咸可以話不成功，便成仁！

（有線300及200台周六晚10時直播）

雙方首循環踢成三比三，但莊家今次都睇好「兵工廠」可以喺呢場倫敦打吡作客贏波，暫時歐洲平均客勝賠率低至1.65倍，亞洲盤開到讓半一。睇番之前阿仙奴作客對同富咸實力差唔多嘅對手好似史雲斯，都唔見讓得咁辣！

其實，「兵工廠」近期嘅聯賽表現好正路，近九仗贏足七場，排名由第十五周嘅第十位上到現今第四。周中喺酋長球場同愛華頓互交白卷，法國前鋒基奧特浪費咗唔少黃金機會，希望佢今晚生性啲啦。「兵工廠」中場韋舒亞復出後表現似乎仲未返到上巔峰，好在威爾斯小將艾朗藍斯可能畀班「廠迷」鬧得多，近期表現醒番晒，周中仲畀過多次致命長傳，只可惜班隊友把握唔到！
富咸上咗岸hea踢

傷兵方面，阿仙奴門將法比安斯基同路斯基皆有傷，施捷斯尼會把守最後一關，其餘攻擊人腳絕對充足，除基奧特外，禾確特、辛迪卡索拉、謝雲奴、阿歷士張伯倫同埋怨無正選嘅普多斯基都可以用。由於呢三分足以決定下屆球隊有無歐聯踢，「兵工廠」一定上足子彈，我對客勝好有信心！

由祖爾領軍嘅富咸依家有四十分在手，已經上咗岸，可以話無欲無求，球隊近三場都未贏過，周中更畀同樣要搶分嘅車路士炒三粒，鬥心似乎差啲喎！再加上富咸近四場都有失波，相信今場難保清白之身，咁計仲唔益埋阿仙奴開客勝？