史浩克上盤本月精選

猪拉多纳

法福殘陣冇態等劏

Alwin上周末3場推介全中，今晚德甲有信心乘勝追擊，皆因法蘭克福主場對史浩克04係期待已久嘅出擊場次。法蘭克福下半季跌晒Watt，今仗殘陣出擊，面對質態都高佢哋一皮、正力爭歐聯入場券嘅史浩克唔夠砌，史浩克作客小讓平半，上盤係Alwin嘅本月精選。

（周六晚9時30分開賽）

法蘭克福係今季最令人驚喜嘅升班球隊，季初曾連續7輪高踞聯賽榜次席，悅目嘅進攻足球令人擊節讚賞，可惜踏入下半季無以為繼，近9輪聯賽只曾一勝，當中有7場入唔到波，新加盟嘅中鋒拿傑二月初首度上陣即梅開二度，但之後9輪完全冇貨交，上半季表現出色嘅進攻中場乾貴士同史堤芬艾格拿亦狀態大跌，最慘仲係防線亦愈踢愈曳，左閘奧薛卡近期頻頻出醜，上輪作客奧格斯堡畀人撳住狂攻，最終輸0比2已經執番身彩。今仗陣容仲嚴重不整，門將奇雲查普繼續養傷，兩大中場支柱美亞同派文舒維加同告因傷缺陣，而曾盛傳受拜仁垂青嘅右閘施巴斯坦真格又累積5面黃牌要停賽，戰鬥力大幅削弱。
代主帥贊斯基拿獲球員支持

Alwin自小已經係史浩克球迷，對「04」動態尤其關注，上仗對利華古遜落後0比2劣勢下扳平，全隊士氣好到不得了，雖然會方一直搵緊下季新帥人選，但球隊喺暫掌帥印嘅贊斯基拿帶領下愈踢愈好，近期喺殘陣下一樣交到超乎理想好成績，隊長賀維迪斯近日接受權威網站《踢球者》訪問時，就公開呼籲會方留住呢位代主帥，全隊目前真正做到上下一心。

史浩克今仗仍然有柏柏杜普路斯、法芬同亨特拉爾等主力因傷缺陣，不過鍾斯同巴尼達可以傷愈復出，防守中場紐斯泰達停賽期滿，陣容已完整得多，球隊近年一直剋住法蘭克福，雙方近13次喺聯賽交鋒，史浩克取得9勝4和不敗佳績，今晚就算作客都讓得起平半。
Alwin 推介：

史浩克04上盤★★★★★

漢堡勝★★★

利華古遜大★★★