紅藍會利記拆車

猪拉多纳

肥賓倒戈留手 主W兩倍唔夠

一位係畢生至愛，一個係暫借情人，地位差天共地，你覺得賓尼迪斯真係想車仔贏波嗎？英超爆發弔詭「紅藍會」，肥賓帶領車路士作客倒戈利物浦，或者會再雪大勇嘅隊長泰利，向舊東家大拋媚眼。馬會主W熱到1.92倍，已畀晒貼士大家，今場一於捧主W！

（有線300及200台周日晚11時直播）
放水討好舊東家

今仗焦點只有一個，就係賓尼迪斯首次作客倒戈紅軍。賓帥崛起於華倫西亞，但利物浦先係佢真正成名地，一躍而成世界級名帥。肥賓於紅軍度過6年，試過神奇稱霸歐洲同戲劇性奪足總盃，並一手一腳打造出費蘭度托利斯、謝拉特、沙比阿朗素、馬斯真蘭奴呢一條世界級中前場攻擊線，紅軍簡直係佢畢生心血。離開紅軍後，肥賓就鬱鬱不得志，難怪佢一直心繫利物浦，就算到依家帶緊車仔，但個心亦從未變藍，早前就豪言他朝一日會再次回巢執掌紅軍，佢今場真係會全心帶領車仔爭勝？拿仁好有疑問。

為應付季尾魔鬼賽程，肥賓大條道理玩陣容輪換，上場泰利轟入兩粒，但賓帥始終話呢位隊長非必然正選，搞到泰利好不滿。肥賓「身在車營心在利」，今仗放水味濃，加上車路士近5場作客輸3場，就算有艾殊利高爾同加利卡希爾復出，亦幫唔到幾多。
無壓力遇強愈強

拿仁多次強調，利物浦本季雖位處中游，但整體打法變得好睇、進取，呢個進步有目共睹。領隊羅渣士強調下季能否取得歐戰資格並不重要，所以球隊目前壓力等於零，將更有利發揮。或者你會問，冇壓力班友仔會唔會Hea踢先？大家可以放心，雖然對上兩場利物浦都同對手互交白卷，但紅軍每次遇強都分外醒神，早前鬥阿仙奴同曼城，作客都佔上風，近期又贏過熱刺，今次為拆車必盡砌。

以目前利物浦人腳、卡士同戰意，其實瓣瓣都不及車仔，但個主W竟然熱到得番1.92倍，可見莊家對紅軍充滿信心。翻查馬會對上10次晏菲路「紅藍會」嘅盤口，利物浦最多都只係讓到平半，而主W賠率就從未低過2倍，今場莊家破天荒將主W質到見新低，大家知點買啦！
兩軍近6季英超對賽成續

賽季 戰果

12/13 車路士主和1:1

11/12 利物浦主勝4:1

車路士主負1:2

10/11 車路士主負0:1

利物浦主勝2:0

09/10 利物浦主負0:2

車路士主勝2:0

08/09 利物浦主勝2:0

車路士主負0:1

07/08 車路士主和0:0

利物浦主和1:1