流浪者中岸水手細紀一戰

猪拉多纳

45000人逼爆悉尼安聯體育場

澳職總決賽由西悉尼流浪者對中岸水手，兩支球隊於常規賽排頭兩位，能順利打入總決賽可謂相當合理。留意到今場比賽安排喺悉尼安聯體育場舉行，睇番今季澳職比賽入座率，頭十位當中有三場都喺悉尼安聯體育場進行，所以話呢個球場係高入座率嘅保證絕對冇錯。因為所有門票已經售罄，故大會估計今場總決賽入場人數會高達4萬5000人，如無意外可成為今季最高入場人數比賽。

澳職總決賽可謂當地體壇盛事之一，與澳洲網球公開賽、一級方程式賽車及墨爾本盃視為同級項目，地位有幾高可想而知，故此當地會有特別交通安排，好讓球迷可順利入場欣賞比賽及參加活動。
場內節目多玩得開心

主辦單位會以嘉年華會形式去包裝，情況如同墨爾本盃一樣。於比賽開打前兩小時，球場已經開放畀球迷入場，屆時球迷可以企埋澳職冠軍獎盃旁邊影番幅威水相。場內仲有大量攤位，其中一項係面部繪彩，球迷可要求繪彩師畫個靚靚會徽係額頭為愛隊打氣。有互動遊戲以及紀念品出售之餘，仲整番場吉祥物接力跑步大賽。咁多精彩節目，大人同細路都一樣玩得開心！

西悉尼流浪者及中岸水手實力接近，加上總決賽一場過定生死，相信雙方會踢得較為謹慎，相信入球唔會太多。睇番雙方今季喺常規賽三度對決賽，三場都係開出細盤，可見呢類「高手過招」唔容易產生入球，細盤可優先留意。

若論贏面的話，西悉尼流浪者應該較高，始終中岸水手自05/06球季起，三次打入總決賽都捧唔到盃，賽績對中岸水手唔多有利。

（有線64台周日下午2時直播）