哨牙蘇 馬達 紅藍「大」鬥法

猪拉多纳

英超「紅藍大戰」今晚爆發，利物浦喺主場對車路士，1.65倍入球大最抵玩。雖然紅軍爭踢歐洲賽希望唔大，但蘇亞雷斯仲有機會做英格蘭足球先生，呢場佢同車仔嘅桑馬達互片，肯定唔會Hea踢，好易開入球騷！

（有線200及300、廣東體育周日晚11:00直播）

現時利物浦落後第5位嘅熱刺8分，冇咩人覺得佢哋爬到頭踢歐洲賽。不過咁，除咗領隊羅渣士要整番場代表作保飯碗，射手蘇亞雷斯都要爭做神射手，而且要為英格蘭足球先生寶座而戰。經過連續429分鐘聯賽入球荒後，相信佢會做番台好戲博加分攞獎，如果唔係邊有籌碼問想簽佢嘅祖雲達斯攞高薪呀？
紅軍王牌爭獎誓破入球荒

呢邊紅軍有蘇亞雷斯連盃賽喪入29球，嗰邊車仔有桑馬達省入18粒、交出25次助攻，淨係佢兩個英格蘭足球先生得獎熱門私片，已經唔驚今場冇波入啦。加上車仔領隊賓尼迪斯同射手費蘭度托利斯都要喺紅軍球迷面前證明自己，點都唔會甘心喺晏菲路食白果嘅，既然「藍戰士」已經連開5場入球大，值得再追。
車仔兼顧歐霸防線大兜亂

再講，車仔跟手仲要喺歐霸盃4強首回合作客巴素利，話唔會分心就呃人嘅，更何況車仔近排防線大兜亂，4人防線成日換人，甚至連34歲嘅保羅費拉拿都試過搬出嚟用，專注力同默契度同時下降，真係唔係咁容易頂住紅軍。唔好忘記，上季車仔作客晏菲路以1:4慘敗，呢場駁火格局，玩1.65倍入球大最啱數！
謝拉特獲選史上最佳球員先生

由《天空電視》喺一個月前舉辦嘅一項調查活動，就歷史上35名英格蘭球員先生選出最佳，結果喺超過30萬選票當中，2006年得主謝拉特力壓亨利成為No.1，認真威水。
車仔後衞入波冠英超

‧利物浦近6次聯賽主場對車仔得4勝1和1負。

‧車路士後衞今季攻入13球為英超最多。

‧車仔連續5場開入球大。

‧藍戰士今季派林柏特落場有71%得勝率，冇佢得13%贏波。
車仔後防曳捧紅軍先入波

睇好今場開入球大，主要係覺得車路士後防唔穩。事實上，車仔近7場比賽有3次先失波，對住修咸頓、新特蘭同曼城都係先被攻陷，證明防線真係出現問題。假如大家睇好紅軍先開紀錄，可以選擇玩利物浦「第一隊入球」，足智得1.66倍熱過車仔嘅2.2倍好多，似乎操盤手都睇好佢哋喎！