維拉作客頂得住 衝冠直路曼聯立晒油

猪拉多纳

英超一哥曼聯今輪壓軸登場，於奧脫福主場迎戰阿士東維拉，尋晚次席曼城作客熱刺全失三分，曼聯今仗一贏，即可提前封王。不過，曼聯季尾立晒油，護級心切嘅維拉實會阻住對手提前開香檳，一於自製受讓球半盤口，捧晒「讓球和」同「讓球客勝」，就算維拉輸一粒都有錢收！

（有線200及300台周二凌晨3時直播）

曼城昨晚作客熱刺輸波，曼聯可印印腳睇定嚟食，「紅魔鬼」呢場當然想贏。蘇豪唔會懷疑佢哋嘅爭勝決心，最怕係班波近況欠銳，對上8戰僅贏3場，淨係試過作客贏沉到爆嘅史篤城兩粒，其餘兩場擊敗下游分子新特蘭及雷丁都係僅熟，上次作客韋斯咸要靠問題球至追和攞番1分，演出欠說服力！

曼聯射手尹佩斯話就話打破入球荒連續兩場有士哥，但其實距離佢嘅最佳狀態仲差好遠。另一主力朗尼近期亦冇晒影，家陣正選地位不保，隨時季尾走人添。至於快翼艾舒利楊格則已因傷提前收咧，踢到呢個階段，成隊波中前場得個香川真司狀態較好，但單靠佢一個孭唔起進攻重責。
維拉未上岸必拚盡

維拉進攻鐵三角賓迪基、艾邦拉荷同安祖斯韋文今仗悉數列陣，當中以射手賓迪基最弗，絕對有力偷雞入波。維拉現時領先尾三韋根3分，仲未上岸，如果佢哋今場贏波攞3分，包尾雷丁同昆士柏流浪就會立即「玩完」。不過考慮到兩軍實力同質素有距，要贏有難度，但預計可以頂住唔會大敗，所以讓「讓球和」同「讓球客勝」都諗得過。